Երևանի թիվ 195 ավագ դպրոցում այսօր տեղի ունեցավ տարբեր ազգերի նկատմամբ իրականացված ցեղասպանությունների վերաբերյալ բաց դաս, որը վարեց ԿԳ նախարար Արմեն Աշոտյանը:
Նա աշակերտներից նախ հետաքրքրվեց, թե ինչ գիտեն հրեաների, ասորիների, եզդիների ցեղասպանությունների մասին, ապա խոսեց մարդկության դեմ կատարված ոճիրների վերաբերյալ տեղեկացվածության կարեւորության մասին:
Նշենք, որ Հայոց ցեղասպանության 100-ամյակի նախաշեմին ԿԳՆ նախաձեռնությամբ մի շարք միջոցառումներ իրականացվեցին դպրոցներում եւ բուհերում: Այս շաբաթվա ընթացքում էլ Հայաստանի բոլոր ավագ դպրոցներում մեկական դասաժամ կտրամադրվի այլ ցեղասպանությունների ուսումնասիրությանը:
Կարդացեք նաև
«Խոսելու ենք ինչպես Ռուանդայի եւ Կամբոջայի ցեղասպանությունների, այնպես էլ Հոլոքոստի մասին: Հայերի ցեղասպանությունից բացի, Հոլոքոստն ամենաուսումնասիրված ցեղասպանություններից է: Յուրաքանչյուր ժողովուրդ պետք է տեղյակ լինի այլ ժողովուրդների պատմության սեւ էջերից»,-լրագրողների հետ զրույցում ասաց Արմեն Աշոտյանը:
Նրա բնորոշմամբ՝ կարեւոր չէ՝ որ կրոնական կամ էթնիկ խմբի դեմ է ոճիր իրականացվում, միեւնույն է՝ այն ուղղված է մարդկության դեմ. «Ցեղասպանությունները չունեն ազգային պատկանելիություն, եւ պատահական չէ, որ որակավորվում են որպես մարդկության դեմ իրականացված ոճիրներ: Եթե այսօր նման գործողությունների է ենթարկվում մի ժողովուրդ, օրինակ՝ եզդիները եւ Մերձավոր Արեւելքի մյուս քրիստոնյա ազգերը, ապա չդատապարտելով եւ չկանխելով դա՝ որեւէ ժողովուրդ չի կարող հանգիստ ապրել եւ մտավախություն չունենալ, որ այդ աղետն իրեն էլ չի սպառնալու»:
Կրթության նախարարն առաջին անգամ չէր ուսուցչի դերում: Վերջին 6 տարիներին նա տարբեր թեմաներով բաց դասեր է անցկացրել: Բնականաբար, 45 րոպեում հնարավոր չէ տալ աշակերտների բոլոր հարցերի պատասխանները, սակայն նախարարը փորձեց սպառիչ տեղեկատվություն հաղորդել:
Լուիզա ՍՈՒՔԻԱՍՅԱՆ
