Ինչպես նախորդ տարիների պետական բյուջեների նախագծերում, այնպես էլ 2016-ի բյուջեի նախագծում նպատակ է դրվել խթանել ծնելիությունը:
Երբ այդ մասին այսօր ԱԺ հանձնաժողովների համատեղ նիստում կառավարության ծրագրերը ներկայացրեց ֆինանսների փոխնախարար Պավել Սաֆարյանը, ՕԵԿ պատգամավոր Հովհաննես Մարգարյանը նրան հիշեցրեց, որ իրենք նպաստների մասին նախագիծ են ներկայացրել: Նա ասաց, որ դեռ նախորդ քառօրյային աշխատանքի եւ սոցիալական հարցերի նախարար Արտեմ Ասատրյանին հարց է ուղղել, որի պատասխանը չի ստացել՝ մենք աշխարհում միա՞կ երկիրն ենք, որը տարբերակված մոտեցում է ցույց տալիս աշխատող եւ չաշխատող մայրերի համար մինչեւ 2 տարեկան երեխայի խնամքի նպաստը տալիս:
Պավել Սաֆարյանը պատասխանեց. «Ասենք, հարյուր հազար դրամով ավելացնելով նպաստը՝ երեխաների թիվը կավելացնե՞նք դրանով: Չեմ կարծում. դա բազմագործոն ֆակտոր է: Այդ գումարներն ընդամենն աջակցություն են, պետք չէ այն գերագնահատել»:
Տեղից զրույցին միջամտեց ՀԱԿ խմբակցության պատգամավոր Հրանտ Բագրատյանը՝ ծիծաղելով. «Երեխան պետք է լինի սիրո արդյունք»`ակամայից համաձայնելով Պավել Սաֆարյանի հետ, որ նպաստով ծնելիություն չես խթանի:
Կարդացեք նաև
Հռիփսիմե ՋԵԲԵՋՅԱՆ
