Հակահայկական ուղղվածությամբ հայտնի, արբանյակային հեռարձակմամբ հաղորդումները տարածող ադրբեջանական CBC հեռուստաընկերության եթերում նոյեմբերի 1-ին, ժամը 20-ից հեռարձակվում էր հարցազրույց «Քաղաքական հետազոտությունների ինստիտուտի» գլխավոր տնօրեն, Ռուսաստանի հասարակական պալատի անդամ, Վլադիմիր Պուտինի վստահված անձ Սերգեյ Մարկովի հետ: Նա ռուսական պատվիրակության կազմում Բաքու է ժամանել նոյեմբերի 1-ին Ադրբեջանում կայացած խորհրդարանական ընտրությունների առթիվ: Ռուսերեն լեզվով ընթացող հարցազրույցի ժամանակ Մարկովը նմանեցրեց Վլադիմիր Պուտինի եւ Իլհամ Ալիեւի վարած քաղաքականությունները: Նա մի քանի արտահայտություն արեց, որոնք, ակնհայտորեն, դուր չեկան հարցազրույցը վարողին: Ռուս քաղաքագետը հայտարարեց, որ խորհրդային տարիներին Հայաստանի բնակիչներն ավելի լավ էին ապրում , քան՝ Ադրբեջանում, իսկ հիմա Ադրբեջանում բնակչությունը համեմատաբար լավ է ապրում: Հարցազրույց վարողը միջամտեց՝ «Ադրբեջանն ինքնաբավ երկիր էր»: Ս. Մարկովը պարզաբանեց. «Նավթից ստացվող եկամուտները Կենտրոն էին գնում»:
Հիշեցնենք, որ 1969-1982 թվականներին Ադրբեջանի ղեկավարը Հեյդար Ալիեւն էր, Հայաստանի համեմատ խորհրդային Ադրբեջանի բնակչության ցածր կենսամակարդակի մասին Մարկովի դիտարկումը չէր կարող դուր գալ մշտապես Ալիեւների ընտանիքի գովքն անող հեռուստաալիքի աշխատակցին:
Ս. Մարկովը նաեւ հայտարարեց, որ Ռուսաստանում լավ չգիտեն Ադրբեջանի մասին եւ դրա պատճառներից մեկն այն է, որ համառուսաստանյան հեռուստաալիքները Բաքվում թղթակից չունեն: Նա Ադրբեջանի հանդեպ ռուսական լրատվամիջոցների հետաքրքրության պակասի պատճառներից մեկն էլ համարեց Ռուսաստանի ԶԼՄ-ներում մեծ թվով հայազգի աշխատակիցների առկայությունը: Պուտինի վստահված անձն ասաց , որ Ռուսաստանի հայ համայնքը, իր տարբերություն այդ երկրում ադրբեջանական համայնքի, լավ է կազմակերպված եւ հավելեց.
«Հայերը Ռուսաստանում այն դերն են կատարում, ինչ-որ հրեաները՝ ԱՄՆ-ում»: Հաղորդավարը հարց տվեց հայերի հանդեպ նման «ամենաթողության» պատճառների մասին: Այդ պահին՝ ժամը 20. 24-ին հարցազրույցը կտրուկ ընդհատվեց եւ եթերում հայտնվեց Ադրբեջանի կենտրոնական ընտրական հանձնաժողովը, ուր խորհրդարանական ընտրություններին մասնակցության մասին տվյալներ էին հրապարակվում:
Կարդացեք նաև
Ամենայն հավանականությամբ, Ռուսաստանում մեծ թվով հայազգի լրագրողների առկայության, հայ համայնքի համախմբվածության վերաբերյալ Ս. Մարկովի արտահայտությունները պատճառ դարձան նրա հարցազրույցի կտրուկ ընդհատման:
Լուսանկարը՝ www.kp.ru-ի
Ոսկան ՍԱՐԳՍՅԱՆ
