Ռամկավար ազատական կուսակցությունը (ՌԱԿ) հոկտեմբերի 31-ին գումարեց վերամիավորումից հետո իր 2-րդ ընդհանուր պատգամավորական ժողովը:
ՌԱԿ ատենապետ Հակոբ Ավետիքյանը լրագրողների հետ զրույցում ասաց, որ ժողովի ընթացքում առանձին բանաձեւ պետք է ընդունեն սահմանադրական փոփոխությունների մասին. ՌԱԿ պատգամավորներն են որոշելու այո են ասելո՞ւ, թե՞ ոչ:
«Մեր գլխավոր մտահոգությունը հետեւյալն է, որ որեւէ օրենք, մանավանդ, հիմնական օրենք, պետք է, որ իրականացվի, իրագործվի, շեղումներ չլինեն: Լավ օրենք ունենալը ոչ մի բան չի նշանակում, երբ դա կյանքի չի կոչվում ամեն ինչում»,- ասաց նա:
Հակոբ Ավետիքյանը հավելեց, որ ՌԱԿ գաղափարախոսությունը այո է ասում խորհրդարանական կառավարական համակարգին, սակայն կուսակցությունը մտահոգվում է, քանի որ դրա համար պետք է ուժեղ թիմ, կուսակցություններ, որը առիթ կտա հետագայում խոշորացնելու գոյություն ունեցող կուսակցությունները: Ըստ նրա՝ Հայաստանը կարող է անցնել խորհրդարանական համակարգին, եթե փոփոխության ենթարկվեն «Կուսակցությունների մասին» օրենքը եւ Ընտրական օրենսգիրքը. «Այլապես մենք կունենանք 19 թվականի բյուրո կառավարություն, որը գիտենք՝ ինչ բերեց մեր երկրի գլխին»:
Կարդացեք նաև
Նա չի համաձայնում այն կարծիքին, թե սահմանադրական փոփոխություններով Սերժ Սարգսյանը ցանկանում է հավերժացնել իր իշխանությունը. «Ես հավատում եմ մեր նախագահի այն բացատրություններին, որ ասում է՝ եթե ես չանեմ, ապա հետագայում ինձ կասեն՝ դու այսքան 2 շրջան անցկացրեցիր, չտեսա՞ր մեր գործող Սահմանադրության թերությունները, ինչո՞ւ ոչինչ չձեռնարկեցիր: Այս առումով՝ ինքը շատ ճիշտ բացատրում էր, առանց իր բացատրության էլ էր հայտնի՝ գործող Սահմանադրությունը խիստ սահմանափակում է նախագահի իշխանությունը, լիազորությունները, բայց կատարվում է մի բան, որ գործող Սահմանադրության պարագայում մենք 3 նախագահ ենք ունեցել, նրանք բացարձակ իշխանության գործառույթներ են վերցրել իրենց վրա՝ առանց Սահմանադրության համապատասխան կետերի: Կնշանակի՝ Հայաստանում այսպիսի սուբյեկտիվ վերաբերմունք միշտ առկա է եղել, եւ սրանից պետք է ձերբազատվել»:
Ամի ՉԻՉԱԿՅԱՆ
