Բոլորիս քաջ հայտնի խաղողը ոչ միայն համեղ միրգ է, այլ նաեւ առողջարար է մեր օրգանիզմի համար:
Բազմաթիվ ուսումնասիրություններ ցույց են տվել, որ խաղողի մեջ առկա ռեսվերատրոլ կոչվող նյութը դրական ազդեցություն ունի առողջության վրա: Դեռ հնուց այն օգտագործվում էր բժշկության մեջ՝ լյարդի ու սրտի հիվանդությունների բուժման ժամանակ, արյան մեջ խոլեստերինի մակարդակը իջեցնելու համար, մրսածության դեպքում, ինչպես նաեւ որպես հակաքաղցկեղային միջոց:
Stay on the Healthy Path.com-ն առանձնացրել է խաղողի այն 10 հատկությունները, որոնք դրականորեն են ազդում մեր առողջության վրա:
1. Խթանում է քաշի կորստին
Վրաստանի համալսարանում իրականացված հետազոտությունները պարզել են, որ ռեսվերատրոլը նպաստում է նիհարելու գործընթացին. կտրուկ նվազեցնում է բջիջների՝ ճարպ հավաքելու հնարավորությունը եւ զգալիորեն խթանում է ճարպային բջիջների ոչնչացմանը:
Կարդացեք նաև
2. Պաշտպանում է սիրտը
Ռեսվերատրոլն ունի արյան անոթների ճկունությունը մեծացնող կարողություն, որն էլ հեշտացնում է արյան շրջանառությունը, իսկ այս դեպքում թթվածինն ու սնուցիչները մատակարարվում են մարմնի բոլոր մասերը: Խաղողը նաեւ կարող է իջեցնել արյան ճնշումը: Որոշ գիտական ուսումնասիրություններ ցույց են տվել, որ օրական 10 մգ ռեսվերատրոլի ընդունումը կարող է կտրուկ նվազեցնել սրտի կաթվածի ռիսկերը:
3. Պաշտպանում է ուղեղի առողջությունը
Շվեյցարիայի հետազոտողների կատարած ուսումնասիրությունները ցույց են տվել, որ ռեսվերատրոլն ունի շատ մեծ դրական ազդեցություն ուղեղի առողջության վրա: Նրանք պարզել են, որ այս նյութը հնարավորություն ունի չեզոքացնելու ուղեղի ազատ ռադիկալներին՝ դրանով իսկ նվազեցնելով Ալցհեյմերի հիվանդության զարգացման ռիսկը:
4. Բարելավում է հիշողությունը
Մեծ Բրիտանիայում անցկացված հետազոտությունները ցույց են տվել, որ ռեսվերատրոլը 200%-ով բարձրացնում է ուղեղի արյան շրջանառությունը: Գիտնականները կարծում են, որ այդ քիմիկատները կարող են բարելավել մեր մտավոր ունակությունները:
5. Պաշտպանում է մաշկը քաղցկեղից
Բազմաթիվ հետազոտություններ ցույց են տվել ռեսվերատրոլի դրական ազդեցությունը նաեւ քաղցկեղի դեմ պայքարում: Այս բաղադրիչը, որով հարուստ է խաղողը, պաշտպանում է մաշկը արեւի վնասակար ճառագայթներից:
6. Պաշտպանում է մարմինը ճառագայթումից
Այս բաղադրիչն ունի ուժեղ եւ պաշտպանիչ ներգործություն ճառագայթային թերապիայի ընթացքում:
7. Ակտիվացնում է երկարակեցության գենը
Ուսումնասիրություններից մեկը ցույց է տվել, որ խաղողի բաղադրիչները կարող են ակտիվացնել այն գենը, որը պատասխանատու է երկարակեցության համար:
8. Օգնում է դիաբեդի բուժումն ավելի արդյունավետ դարձնել
Համաձայն «Ալբերտ Էյնշտեյն» բժշկական քոլեջի անցկացրած հետազոտությունների՝ ռեսվերտրոլը կարող է նվազեցնել արյան մեջ շաքարի մակարդակը մինչեւ 10%-ով:
9. Օգտակար է բորբոքումների բուժման ժամանակ
Խաղողի բաղադրիչները գերազանց հակաբորբոքային հատկություններ ունեն:
10. Օգնում է մկանների վերականգնմանը
Ռեսվերատրոլն օգնում է բջիջներին ազատվել թունավոր նյութերից՝ վերացնելով լարվածությունը եւ մկանային ցավը:
Պատրաստեց ՆՈՒՆԵ ՂԱԶԱՐՅԱՆԸ
«Առավոտ» օրաթերթ
30.10..2015
