Այսօր ԱԺ ճեպազրույցների ժամանակ լրագրողները ԲՀԿ պատգամավոր Միքայել Մելքումյանից հետաքրքրվեցին՝ փետրվարի 12-ից հետո ԲՀԿ-ն իրեն ո՞նց էր զգում, ցավո՞տ է այս անցումային փուլը:
Նա պատասխանեց. «Քաղաքական գործունեությունը դինամիկ գործընթաց է: Փետրվարից հետ քաղաքական դաշտը հանդարտվեց եւ այսօր, նաեւ մինչեւ 2017-ը իշխանափոխության լուրջ հայտ Հայաստանում չկա: Չեմ կարող ասել փոշիացավ, ուղղակի մեր 25 տարիների քաղաքական փորձը ցույց է տալիս, որ այլեւս մեր պայմաններում փողոցից իշխանության չեն գալիս, դա հնարավոր չէ: Որ ասում են՝ 100 հազար մարդ դուրս հանեին՝ զիջումների կգնան եւ այլն, տենց բան չկա: Եթե դու հայտ ես ներկայացնում, 150 հազար հավաքում ես, դու հայտնվում ես անհավասար վիճակում: Հասարակական կարգ է խախտվում, օրենքի ինչ-որ տառ է խախտվում եւ միանգամից համապատասխան կառույցի կողմից սանկցիա է սկսում, դուրս է գալիս քաղաքական տրամաբանությունից, գնում է ուրիշ դաշտ: Դրա համար միակ գործիքը ընտրությունների միջոցով իշխանության մաս կազմելը կամ ընդդիմություն մնալն է: Բայց մենք մեզ լավ ենք զգում: Քաղաքականությունը հնարավորությունների արվեստ է: Կոնկրետ իմ համար ցավոտ չէ»:
Թե ով է ցավազրկել Միքայել Մելքումյանին, ասաց, որ դա իրենց հեղինակային իրավունքն է, դա կա քաղաքական զինանոցում, բայց չպետք է խրոնիկ դառնա դրա օգտագործումը:
Հարցին՝ ասում եք, որ փողոցային ճանապարհով իշխանություն չի փոխվում, կարո՞ղ եք ասել մի դեպք, որ ոչ փողոցային ճանապարհով Հայաստանում իշխանություն է փոխվել՝ Միքայել Մելքումյանը պատասխանեց. «Նախ, սկսենք 88 թվից, դա այլ բան էր, դա ազգային ազատագրական շարժում էր: Հենց այս Սահմանադրությամբ իշխանություններն այնքան ուժեղ են: Դրա համար պետք է կառավարման համակարգը փոխվի: Մեր քաղաքական դրույթն է՝ գնալ քաղաքական մենիշխանության ապակենտրոնացման»:
Կարդացեք նաև
Լրագրողները նաեւ հետաքրքրվեցին՝ Էլինար Վարդանյանի հետ կապված ասում էիք, որ կա սկզբունքային տարաձայնություն, հիմա, երբ Էլինարին հեռացրեցիք, չե՞ն լինելու սկզբունքային տարաձայնություններ, արդեն միասեռ որոշումնե՞ր են լինելու՝ նա պատասխանեց. «Ես շատ կարեւորում եմ ներկուսակցական բանավեճը: Իսկապես, դա էլ մի բան չի, որ Կոմկուսի նման մեկը մի բան ասի՝ մյուսներն ասեն՝ այո: Շատ լավ է, որ եղել է բանավեճ: Քաղաքական դիրքորոշում հայտնելու համար որեւէ մեկն իրավունք չունի մեկ ուրիշին պարսավի կամ գնդակահարի: Մենք դա նորմալ ենք ընդունում: Բայց եթե արդեն կա որոշում, պետք է այդ որոշումները հարգենք: Եթե մենք քվեարկությունների ժամանակ ունենանք 4 տեսակի քվեարկություն, մեզ որեւէ մեկը չի հարգի: Բայց կարծում եմ, խնդիրը հաղթահարված է եւ մենք արժանապատիվ կշարժվենք առաջ»:
Հռիփսիմե ՋԵԲԵՋՅԱՆ
