«Խնդիրն այն է, որ սահմանադրական փոփոխությունների նախաշեմին մնացել է մի 40 օր եւ կրկին փոփոխություններ ենք կատարում օրենսդրական դաշտում»,- հոկտեմբերի 29-ին «Նոյյան տապան» մամուլի ակումբում լրագրողների հետ հանդիպման ընթացքում ասաց քաղաքագետ, «Չեք անցկացնի» նախաձեռնության անդամ Արմեն Գրիգորյանը:
Ըստ նրա, մեկ այլ խնդիր է, որ ժողովրդի վստահությունը զրոյական է, նա համարում է՝ դա ունի մեկ պատճառ՝ անցյալում տեղի ունեցած ոչ թափանցիկ ընտրությունները. «Ցանկացած օրենսդրական նախաձեռնություն, երբ որ չկա վերահսկելու հնարավորություն, քաղաքացու մոտ դա կասկած է առաջացնում: Մյուս կողմից քաղաքացու իրավունքը ապահովելու խնդիր կա, որպեսզի քաղաքացին ունենա իրավունք, բոլորս էլ կողմ ենք, որ բոլորի ընտրական իրավունքը պաշտպանվի, բայց երբ որ այդ իրավունքի պաշտպանությունը կատարվում է մի քանի օր առաջ եւ այսպիսի արագացված տեմպերով, ապա կասկած է առաջանում, թե ինչու է կատարվում այս փոփոխությունը: Եվ քանակն էլ մեծ է քաղաքացիների, վերահսկողություն չի լինի եւ նույնիսկ սարքերը չեն պատվիրելու: Ես համոզված եմ, որ սարքերը չեն պատվիրելու, որպեսզի իմանան տվյալ քաղաքացին քվեարկություն կատարե՞լ է, թե՞ ոչ»:
Արմեն Գրիգորյանը համարում է, որ խնդրի լուծումներից մեկը կլիներ, որ այս գործընթացը ավելի շուտ սկսվեր, հանրությանը ժամանակ տային, խնդիրը օրենսդրական դաշտում դանդաղ անցներ, որոնք իրենց հերթին կհանգեցնեին նրա, որ նորմալ անցում եւ վերահսկողություն լիներ:
Ամի ՉԻՉԱԿՅԱՆ
Կարդացեք նաև
Լուսանկարը՝ «Նոյյան տապանի»
