«Ընտրական օրենսգրքում» եւ «Նույնականացման քարտերի մասին» օրենքում փոփոխություն կատարելու մասին ՀՀԿ-ական պատգամավորների նախագծի քննարկումն ԱԺ-ում շարունակվում է:
ՕԵԿ խմբակցության ղեկավար Հեղինե Բիշարյանը խմբակցության կարծիքը ներկայացնելիս ասաց, որ իրենք միանշանակ դեմ են այդ նախագծին, քանի որ երկակի ստանդարտ է կիրառվում եւ նպաստելու է կեղծիքներին:
ՀՅԴ խմբակցության տեսակետը ներկայացնելիս՝ Աղվան Վարդանյանն ասաց, որ իրենց քվեարկությունը մեծապես կախված է նրանից, թե իշխանությունն ինչքանով կընդունի իրենց ներկայացրած առաջարկները:
ՀԱԿ խմբակցության ղեկավար Լեւոն Զուրաբյանի խոսքերով՝ «Եթե չկա էլեկտրոնային ընթացակարգ նույնականացման գործընթացը ստուգելու, դա դառնալու է բառդակ: Եթե մենք ցանկանում ենք ունենալ հանրաքվե, որը հավատ կներշնչի, ուրեմն բազմակի քվեարկությունները կանխելու համար հստակ միջոց պետք է ընդունել՝ թանաքոտումը, որը առաջարկում են 5 խմբակցություններ: Միակ քաղաքական ուժը, որը ընդդիմանում է սրան՝ ՀՀԿ-ն է»:
Կարդացեք նաև
Նա հայտարարեց, որ ընտրակեղծարարին ցանկացած անեծք հասնում է. «Ես խորհուրդ եմ տալիս մեր իշխանություններին, մտածեք այս անեծքի մասին: Ավելի մեծ անեծք, քան այն, ինչ բերում է ժողովրդի կամքի աղավաղումը, խեղաթյուրումը՝ չկա: Դա լինելու է ձեր ամենամեծ մեղքը: Բոլոր ընտրակեղծարարներին ասում եմ՝ մի բերեք ձեր գլխին ժողովրդի այդ անեծքը»:
ԱԺ փոխխոսնակ Հերմինե Նաղդալյանն էլ հեգնեց. «Մենք հավատում ենք այդ հարցում ձեր մասնագիտական գիտելիքներին, շնորհակալություն, որ կիսվեցիք մեզ հետ ձեր պրակտիկ գիտելիքներով»:
ԲՀԿ-ի անունից հանդես գալով՝ Միքայել Մելքումյանն էլ ասաց, որ մատները թանաքոտելու հարցում իսկապես իրենք խմբակցությունով միակամ են: Նա առաջարկեց, որ իշխանությունը ընդունի այդ առաջարկը: Իսկ խմբակցությունը որոշել է ազատ թողնել իր պատգամավորներին՝ ով ինչպես հարմար գտնի՝ թող քվեարկի:
Իսկ ՀՀԿ տեսակետը ներկայացնելիս Վահրամ Բաղդասարյանը համաձայնեց հասարակության այն կարծիքին, որ խորհրդարանում զբաղվում են ժամավաճառությամբ. «Սա այն հարցը չէր, որ 2-3 օր պետք է քննարկվեր»:
Անեծքների հետ կապված նա դիմեց Լեւոն Զուրաբյանին. «Ես նոր եմ հասկանում, թե ինչու են անիծված նրանք մինչեւ այսօր, որ որեւէ հաջողության չեն հասել: Այնքան այլանդակություններ են արել ընտրությունների ժամանակ 90-ականներին, այնքան մեխանիզմները, որ առաջարկում են, դրանք բոլորը իրենք կիրառել են, մենք արմատախիլ ենք անում արդեն 20 տարի, անում ենք, անում, չենք կարողանում ամբողջովին արմատախիլ անել»:
Ինչ վերաբերում է ընտրացուցակներին, որոնց մասին խոսեցին եւ Արամ Մանուկյանը, եւ Հեղինե Բիշարյանը՝ Վահրամ Բաղդասարյանն ասաց. «Մարդիկ արտագաղթել են, ՀՀ-ում չեն, պետք է բոլորին ընդգրկել այդ ցուցակներում: 40 օր առաջ դրանք հրապարակվում են, որպեսզի մենք կարողանանք գտնել անճշտությունները»:
Ըստ նրա, բոլոր քաղաքական ուժերն ուզում են քնեն, արթնանան ու հակասահմանադրական ճանապարհով հայտնվեն բուրգի գլխին. «Ձեւավորեք ձեր հանձնաժողովները, վստահված անձինք, դրանից լավ վերահսկողության ձե՞ւ: Ի՞նչ եք ընկել ապակողմնորոշում ժողովրդին նույնականացման քարտերի խնդրով: Եթե ասեինք, որ այդ քարտով չեն կարող քվեարկել, դուք պիտի ասեիք՝ այդ 180 հազարը մեր ոչ-երն են, դուք զրկում եք նրանց: Ինչ էլ բերեինք՝ դուք պիտի օգտագործեիք այս ամբիոնը»:
Հռիփսիմե ՋԵԲԵՋՅԱՆ
