Բարձրագույն որակավորման հանձնաժողովը (ԲՈՀ) հերթական անգամ հրապարակել է չհաստատված կամ մասնագիտական խորհուրդներ կրկնական քննարկման վերադարձված աշխատանքների ցուցակը՝ հոկտեմբերի 27-ի դրությամբ:
66 աշխատանքներից 15-ը տնտեսագիտության ոլորտից է, 8-ը բժշկությունից, նույնքան էլ կենսաբանությունից, մնացած աշխատանքները այլ ոլորտներից են: «Խոտանված» աշխատանքներից 4-ը դոկտորական է:
Բժշկության ոլորտում օրերս պաշտպանված դոկտորական աշխատանքների թվում է Պաշտպանության նախարար Սեյրան Օհանյանի տիկնոջ՝ Ռուզաննա Խաչատրյանի (լուսանկարում) ատենախոսությունը: Ռուզաննա Խաչատրյանին դոկտորի կոչում է շնորհվել Երևանի պետական բժշկական համալսարանում գործող ԲՈՀ-ի 045 Առողջապահության կազմակերպման մասնագիտական խորհրդի որոշմամբ, ինչը մեծ աղմուկ է առաջացրել սոցցանցերում եւ հանրության շրջանում:
Aravot.am-ը ԲՈՀ-ի նախագահ Լիլիթ Արզումանյանից մեկնաբանություն խնդրեց նախարարի տիկնոջ դոկտորականի վերաբերյալ:
Կարդացեք նաև
Տիկին Արզումանյանն ասաց, որ պաշտպանությունը կայացել է ատենախոսության կարգով: Նրա խոսքով, 2014-ին ԵՊԲՀ-ը նույնիսկ գիրք է հրատարակել «Առողջապահության հիմնախնդիրները՝ ՀՀ զինված ուժերում» վերնագրով, որը դոկտորականի հիմքն է, ու այդ գիրքը ցանկացողները կարող են ձեռք բերել: ԲՈՀ-ի նախագահը նաեւ շեշտեց. «Արտառոց ոչինչ չկա, ատենախոսությունը շուրջ 5 ամիս քննարկվել է ԲՈՀ-ում, իսկ զարմանքի աղբյուրը պետք է փնտրել այլ տեղերում»:
Ի պատասխան Aravot.am-ի մյուս հարցի, տիկին Արզումանյանը հայտնեց, որ միայն Ռուզան Խաչատրյանի ատենախոսության թեման չէ, որ գաղտնի է եղել, տարբեր տարիների տասնյակ գաղտնի թեմաներով դիսերտացիաներ են պաշտպանվել բժշկության, ֆիզիկայի, մաթեմատիկայի ոլորտներում:
Գոհար ՀԱԿՈԲՅԱՆ
Անկեղծ ասած սկզբում հիացած էի տիկնոջ գեղեցկությամբ ու ճաշակով: Բայց երբ տարբեր կայքերում տեսա նույն դիրքով նստած, դեմքի նույն արտահայտությամբ, բայց տարբեր հագուստով ու հագուստին համապատասխան ծաղիկներով նկարները… կներեք, բայց ոնց որ ծաղիկների գովազդի բացիկներ լինեն: Չնայած բժշկագիտության դոկտորն էլ կարող է գովազդով զբաղվել, եթե ազատ ժամանակ շատ ունի: