Կառավարությունը մտադիր է օրենքով վերահսկել հասարակական կազմակերպությունների ֆինանսական միջոցները: Կառավարության այսօրվա նիստում հաստատվեց «Հասարակական կազմակերպությունների մասին» եւ հարակից մի շարք օրենքներում փոփոխություններ կատարելու օրենքի նախագծերի փաթեթը։ Արդարադատության նախարար Արփինե Հովհաննիսյանը հիշեցրեց, որ դեռեւս 2009թ-ի սեպտեմբերին կառավարության կողմից հ/կ-ների մասին օրենքի փաթեթ էր ներկայացվել, որով նախատեսվում էր մի շարք վերահսկողական գործիքների կիրառում, ինչն առաջացրել էր բազմաթիվ հ/կ-ների մտահոգությունը եւ դժգոհությունը։
Արդյունքում, նրա խոսքերով, ստեղծվեց մի քաղաքացիական նախաձեռնություն, որի շուրջ համախմբվել էր 300 հասարակական կազմակերպություն։ Նախարարն ասաց, որ այս փաթեթը քննարկվել է բոլոր շահագրգիռ կառույցների հետ, դրանում հաշվի են առնվել բոլոր առաջարկությունները: Նախագծով նաեւ նախատեսվում է, որ հ/կ-ները ֆինանսական հաշվետվություն պետք է ներկայացնեն:
Հովիկ Աբրահամյանն ասաց, որ կարեւորում է հ/կ-ների հաշվետվողականության բարձրացումը. «Կարեւորում եմ հ/կ-ների ձեռնարկատիրական գործունեությամբ զբաղվելու հնարավորության ընդլայնումը, ինչը կարող է հիմնարար նշանակություն ունենալ նրանց ինքնուրույնության եւ ֆինանսական կայունության համար»:
Լուսինե ԲՈՒԴԱՂՅԱՆ
