Այսօր կառավարության նիստին հաջորդած բրիֆինգում լրագրողները էկոնոմիկայի նախարար Կարեն Ճշմարիտյանից հետաքրքրվեցին, թե իրո՞ք կառավարության անդամներն այդքան մեծ տեղ են տալիս Doing Business-ի եւ նմանօրինակ զեկույցներին: Նշենք, որ կառավարության նիստում, երբ վարչապետը ներկայացրեց
Համաշխարհային բանկի Doing Business զեկույցում Հայաստանի արձանագրած հաջողությունները, նախարարին հանձնարարեց մանրամասն ներկայացնել դրանք, որպեսզի ներդրողները պատկերացում կազմեն Հայաստանի ներդրումային միջավայրի մասին:
Հարցին, թե, օրինակ, եթե կանադացի գործարարը կարդա այդ զեկույցն ու որոշի գալ Հայաստան ու ցանկանա շաքարավազ ներկրել, ի՞նչ իրավիճակ կստեղծվի, իրո՞ք այդ զեկույցը արտացոլում է իրական պատկերը, Կարեն Ճշմարիտյանն ասաց` այս ցուցանիշների մեջ մենաշնորհների մասին ոչինչ չկա. «Ձեր նշած մոնոպոլացման աստիճանը, որպես գնահատական եւ ցուցանիշ, նշված չէ այստեղ, դրա համար կան այլ զեկույցներ: Խոսքը վերաբերվում է նրան, ինչը կա այս զեկույցում: Իհարկե, մոնոպոլիայի առկայությունը բացասական է, բայց այն մասով, որով կան այստեղ ընդգրկված տվյալներ, ներկայացնում են իրական պատկերը»:
Լրագրողները նաեւ հարցրին, եթե Doing Business զեկույցում Հայաստանի վարկանիշն ամեն տարի բարձրանում է, ինչո՞ւ են գնալով Հայաստանում կատարվող օտարերկրյա ներդրումները պակասում:
Կարդացեք նաև
Այս հարցին էլ Էկոնոմիկայի նախարարն ասաց, որ համաձայն չէ, որ տարեցտարի ներդրումները նվազում են. «Օտարերկրյա ներդրումները ոչ թե իջնում են, այլ բարձրանում են: Նվազում են ուղղակի ներդրումները, բայց դրանք մի մասն են օտարերկրյա ներդրումների»:
Լուսինե ԲՈՒԴԱՂՅԱՆ
