Օրերս ԱԺ տնտեսական հարցերի մշտական հանձնաժողովում Տնտեսական մրցակցության պաշտպանության հանձնաժողովի նախագահ Արտակ Շաբոյանն ու Խաչատուր Քոքոբելյանը վիճել էին միմյանց հետ: Վերջինս Շաբոյանին քննադատել էր, որ երկիրը խեղդված է մոնոպոլիաների մեջ, իսկ Շաբոյանը իր բուն գործառույթը թողած՝ ԱԺ-ում բուֆետների սննդից է խոսում: Արտակ Շաբոյանն էլ լրագրողների հետ զրույցում անհեթեթություն էր որակել Քոքոբելյանի քննադատությունը:
Այս առնչությամբ «Առավոտի» հետ զրույցում Խաչատուր Քոքոբելյանը բարկացավ՝ ասելով. «Ես ընդհանրապես ոտից գլուխ անհեթեթություն եմ համարում այդ հանձնաժողովի գոյության փաստը, որովհետեւ ՀՀ քաղաքացիների համար մինչեւ այս պահը չկա մեկ որակական խնդիր, որը լուծել է այդ հանձնաժողովը: Ես գտնում եմ, որ դա մեր բյուջեի համար մեծ կորուստ է»:
Ըստ նրա՝ իհարկե, նման հանձնաժողով պետք է երկիրն ունենա, բայց աշխատող եւ գործող հանձնաժողով. «Հայաստանում այսօր չկա որեւէ մեկը, այդ թվում՝ ձեր նշած մարդը, որ չգիտի՝ Հայաստանը խեղդված է մոնոպոլիաների մեջ: Կա՞ մի դեպք, գոնե մի ոլորտ, որ ազատականացրել են: Ինձ հայտնի չէ, եւ ես կուզենայի փաստերով խոսել»:
Մեր դիտարկմանը, որ Արտակ Շաբոյանն ընդգծում է՝ ըստ օրենքի, Հայաստանում մենաշնորհներ չկան, կան միայն գերիշխող դիրք ունեցողներ, Խաչատուր Քոքոբելյանը պատասխանեց. «ՀՀ-ում վստահաբար չկա որեւիցե իրազեկ քաղաքացի, ում հետաքրքրում է տնտեսությունը եւ տնտեսության վիճակը, եւ որը չգիտի, որ Հայաստանում կարեւորագույն ոլորտները գտնվում են տոտալ վերահսկողության տակ: Եվ այդքանից հետո խոսել, որեւիցե մի օրինակ գոնե չբերել՝ առնվազն լուրջ չեմ համարում: Մեր հարկատուների փողերով ձեւավորվող կառույցները պարտավոր են հետամուտ լինել մեր քաղաքացիների շահերին»:
Հ. ՋԵԲԵՋՅԱՆ
Կարդացեք նաև
«Առավոտ» օրաթերթ
28.10..2015
