«Ավան Արյան» հրատարակչությունը հրատարակել է Ղարիբ Մագթաղյանի «Սիրո ճամփա» բանաստեղծությունների ժողովածուն: Գիրքը խմբագրել է Վասակ Դարբինյանը:
Հեղինակը՝ լուսահոգի Ղարիբ Մագթաղյանը, ոգեշնչված էր Կողբ գյուղի մոտակայքում գտնվող Կոզման բնակավայրով, նա համոզված էր, որ Կոզմանն աշխարհի լավագույն անկյունն է: Հայրենի եզերքի հանդեպ սերն ուղղակի «ծորում» է նրա բանաստեղծություններից, որոնք, ցավոք, կյանքի օրոք չեն հրատարակվել: Ղարիբ Մագթաղյանի բանաստեղծությունները մոսկվաբնակ դստեր նախաձեռնությամբ Մոսկվայում են հրատարակվել փոքրիկ ժողովածուով, ապա տեղ գտել Հայրենական պատերազմի հաղթանակի 70-ամյակի առիթով լույս տեսած գրական մի ալմանախում:
Ղարիբ Մագթաղյանի բանաստեղծությունները բարության, մարդկայնության, հայրենասիրության, գեղեցիկի ձոներգեր են:
Հեղինակը ներելու ու բարձր կանգնելու կոչ է անում բոլորին, քանզի համոզված է.
Ներիր դու բոլոր մեղավորներին,
Անսխալ մարդիկ աշխարհում չկան,
Կամք գտիր քո մեջ եւ ուժեղ եղիր,
Թող երկինքն անի դատ ու դատաստան:
Հեղինակը ընթերցողին առաջին իսկ տողերից «իրենով է անում», նրան ներքաշում իր ապրված զգացումների, անձնական ցավի, հիշողությունների մեջ: Ասվածի լավագույն արտահայտությունն է Լյուսիին նվիրված նուրբ բանաստեղծությունը.
Այտեր ուներ ցորնագույն,
Սիրտը՝ փխրուն ապակի,
Որ փշրվում էր իսկույն
Լուսին, քո նուրբ ապտակից:
Մագթաղյանի ժողովածուում նաեւ քաղաքական սատիրա կա, օրինակ՝ «Խորհրդարան» բանաստեղծության մեջ.
Խորհուրդ տուր ինձ, խորհրդարան,
Իր չմնաց էշս բեռնեմ,
Գողանամ ու մտնեմ դարա՞ն,
Թե՞ օրենքով սովից մեռնեմ:
Ղարիբ Մագթաղյանի դուստրը հուսով է, որ հայրիկի բանաստեղծությունները լուսավոր զգացողություններ կպարգեւեն ընթերցողներին:
«Առավոտ» օրաթերթ
28.10..2015
