Առաջին հերթին պետք է իմանալ, որ Դաունի համախտանիշը հիվանդություն չէ, այլ գենետիկ վիճակ, որի պատճառը ավելորդ քրոմոսոմի առկայությունն է: Այս մասին գրում է Foods and Healthy Life.com-ը:
Դաունի համախտանիշ ունեցող մարդկանց միջազգային օրը հաստատվել է 2006 թվականի մարտի 21-ին: Այս ամսաթիվը հատուկ իմաստ ունի, քանի որ 21-ն այս համախտանիշը խորհրդանշող թիվն է. Դաունի համախտանիշով ծնված երեխաների օրգանիզմում քրոմոսոմների 21-րդ զույգը կանոնավոր 2-ի փոխարեն ներկայացված է 3 կրկնօրինակով: 3-րդ կրկնօրինակը երեխայի օրգանիզմում ձեւավորվում է դեռեւս մոր արգանդում: Ստացվում է այսպես՝ 3-րդ ամսվա՝ մարտի 21-րդ օրը նշվում է Դաունի համախտանիշ ունեցող մարդկանց միջազգային օրը:
Դաունի համախտանիշ ունեցող երեխաների մոտ նկատվում են ֆիզիոլոգիական մի շարք առանձնահատկություններ՝ տափակ դեմք, ցածր հասակ, դեպի վերեւ թեքված աչքեր: Այս մարդիկ ունեն նաեւ խիստ արտահայտված մտավոր խնդիրներ՝ թերզարգացած ուշադրություն, ընկալում, հիշողություն, խոսք: Նրանց հատուկ է տրամադրության կտրուկ տատանումները:
Դաունի համախտանիշ ունեցող երեխաներն ավելի դանդաղ են զարգանում, քան իրենց հասակակիցները, սակայն նրանք ունեն որոշակի ունակություններ, որոնք հնարավոր է զարգացնել համապատասխան նեղ մասնագետների եւ, իհարկե, ծնողների համատեղ աշխատանքի շնորհիվ, ինչի արդյունքում կարող են ստանալ զգալի դրական արդյունքներ:
Որպեսզի հնարավոր լինի խուսափել Դաունի համախտանիշով երեխա ունենալուց, հղի կինը նախածննդյան ժամանակահատվածում կարող է կանխարգելիչ հետազոտություններ եւ բուժզննումներ անցնել, որոնք ցույց կտան, թե արդյո՞ք պտղի մոտ նկատվում են Դաունի համախտանիշի նշաններ:
Կարդացեք նաև
Պատրաստեց ՆՈՒՆԵ ՂԱԶԱՐՅԱՆԸ
«Առավոտ» օրաթերթ
28.10..2015
