Վերջերս «Վանաձորի բաղնիքային տնտեսություն» ՓԲԸ-ի գործերը վատացել են, կառավարությունն ուզում է աջակցել՝ վարկի մարման ժամկետն է ուզում հետաձգել
Կառավարությունը «համաներում» կանի «Վանաձորի բաղնիքային տնտեսությանը». Վաղվա կառավարության նիստի օրակարգում ներառված նախագծով առաջարկվում է այս բաղնիքային տնտեսությանը համաշխարհային բանկի կողմից տրամադրված վարկի տոկոսներն եւ տույժերը ներել, ինչպես նաեւ այդ վարկի մարման ժամկետները հետաձգել:
Ըստ նախագծի,կառավարությանն առաջարկվում է թույլատրել ֆինանսների նախարարին հետաձգել նախարարության եւ «Վանաձորի բաղնիքային տնտեսություն» ՓԲԸ միջեւ 2006 թվականին կնքված ապրանքային վարկային պայմանագրի հիման վրա ընկերությանը տրամադրված 361332 դոլարին համարժեք դրամի չափով վարկի մնացորդի մարման ժամկետները` ներելով սույն որոշման ընդունման օրվա դրությամբ հաշվարկված վարկի տոկոսների եւ տույժերի վճարումը:
«Վանաձորի բաղնիքային տնտեսությունը», ինչպես նշված է նախագծում, պարտքի մարման նպատակով պարտավոր է 2016 թվականից սկսած մինչեւ 2025 թվականը ներառյալ ՀՀ պետական բյուջե վճարել ամեն 25,292 դոլարին համարժեք դրամ:
Նախագծի հիմնավորման մեջ նշված է, որ «Վանաձորի բաղնիքային տնտեսության» գործերը վերջերս վատ են, վերջին ժամանակաշրջանում ընկերության շրջանառության ծավալների կրճատումն անհնարին է դարձրել վարկի սպասարկումը. «Ուստի, նախագծով առաջարկվում է ընկերության շարունակականությանը նպաստելու նպատակով հետաձգել վարկի մայր գումարի մարման ժամանակահատվածը, ինչպես նաեւ ներել քննարկվող նախագծի ընդունման օրվա դրությամբ հաշվարկված տոկոսներն ու տույժերը»:
Կառավարություն ներկայացված փաստաթղթով վստահեցվում է, որ այս ընկերությունը բաղնիքի շենքը հասարակական կառույցի վերափոխելու համար կատարել է ավելի քան 100 մլն դրամի ներդրում, որի արդյունքում ապահովվել է աշխատատեղեր: 2006 թվականից առ այսօր ընկերությունն ունեցել է մոտ 270 մլն շրջանառություն՝ կատարելով համապատասխան հարկային պարտավորությունները:
Ներկայումս մայր գումարի մասով ընկերության պարտքը կազմում է 252928 դոլար, 2015 թվականի համար պարտավորությունը կազմում է 36100 ԱՄՆ դոլար:
Նելլի ԲԱԲԱՅԱՆ
