«Ասում են՝ ժամանակի խնդիր է: Լավ պատճառ է: Օրեր առաջ գյումրեցիները իրենց մտահոգությունն էին հայտնում՝ լավ, արդյոք ճի՞շտ է ընտրված ամսի 6-ը: Աղետալի երկիր է, երկրաշարժ է եղել, ամսի 7-ին բոլորը գնում են 28 հազար անմեղ զոհերի հիշատակը հարգելու»,- Ընտրական օրենսգրքում եւ Նույնականացման քարտերի մասին օրենքում փոփոխություն կատարելու մասին ՀՀԿ-ի նախագծի քննարկման ժամանակ իր ելույթում ասաց ՕԵԿ խմբակցության պատգամավոր Հովհաննես Մարգարյանը:
Նա հարցրեց. «Աղետի գոտին ունի շուրջ 400 տեղամաս, 3000 հանձնաժողովի անդամ: Ամսի 7-ին պետք է ամփոփեն արդյունքները: Սա լավագույն պատճառն է, որպեսզի մենք կարողանանք քվեարկության օրը հետաձգենք, հետաձգենք գործընթացը: Ես ընտրական հանձնաժողովների ցանկն եմ պատրաստում, հանձնաժողովի անդամները ինձ հարցնում են՝ մենք ընտրական գործընթացին ո՞նց մասնակցենք, պետք է գնանք գերեզմանոց հաջորդ օրը: Եկեք գտնենք լուծումը, հո քարի վրա գրվա՞ծ չի»:
Նա ասաց, որ իրենք կողմ էին Տիգրան Ուրիխանյանի նախագծին, որը եթե անցներ՝ նույնականացման քարտերի խնդրին լուծում կտրվեր. «Ոչ թե լրատվության, քաղաքական դաշտում չոչ անողները եզը վերցնեն, տակը հորթ ման գան եւ փորձեն բախումներ ստեղծեն: Պարոն Ուրիխանյան, հուսով եմ, դուք էլ դրան կանդրադառնաք ու հերթական անգամ երազախաբ կանեք այն գործիքներին, որոնք արդեն ժանգոտվել են եւ չեն կարող ընդդիմության դաշտում համագործակցող քաղաքական գործիչների մեջ սեպ խրել»:
ԱԺ փոխխոսնակ Էդուարդ Շարմազանովն արձագանքեց. «Շատ բոցաշունչ ելույթ էր, բայց հանրապետության նախագահի հրամանագիրն արդեն եղել է, եւ այստեղ իրավաբաններ կան, կասեն, որ մենք՝ ԱԺ-ն չի կարող փոխել օրը»:
Կարդացեք նաև
Հռիփսիմե ՋԵԲԵՋՅԱՆ
