Թուրքագետ Մուշեղ Խուդավերդյանը կարծում է, որ Թուրքիայում իշխող «Արդարություն և զարգացում» կուսակցությունը նոյեմբերի 1-ին կայանալիք խորհրդարանական ընտրություններից առաջ փորձում է սիրաշահել նաև Թուրքիայում բնակվող հայերին: Նա չի բացառում, որ հայերին սիրաշահելու համար է Ստամբուլի Թուզլայի շրջանում գտնվող հայկական մանկատունը՝ «Քամփ Արմեն» անունով հայտնի ամառային ճամբարը, նախօրեին վերադարձվել հայկական համայնքին:
Թուրքագետի գնահատմամբ՝ Թուրքիայի նորագույն պատմության մեջ ներքին և արտաքին քաղաքական առումով ամենալարված ժամանակաշրջանը հիմա է (թուրք-քրդական թշնամանք, ռուս-թուրքական սրված հարաբերություններ, միջկուսակցական լարված հարաբերություններ և այլն):
«Թուրքիայում խորհրդարանական քաոսը կշարունակվի նաև ընտրություններից հետո,- համոզված է Մ. Խուդավերդյանը.- նախընտրական շրջանում անցկացված սոցհարցումները վկայում են, որ իրադրությունը հունիսի 7-ից հետո չի փոխվել, և նոյեմբերին 1-ին կայանալիք խորհրդարանական ընտրություններում «Արդարություն և զարգացում» կուսակցությունը մեծամասնություն չի կազմի: Այնպես որ, խորհրդարանական քաոսը կպահպանվի»:
Սիրանուշ ՀԱՅՐԱՊԵՏՅԱՆ
