Գագիկ Համբարյանը չի կարծում, թե Թուրքիան կարող է ազդեցություն ունենալ սահմանի վրա, որպեսզի ազդեցություն ունենա Հայաստանում սպասվող սահմանադրական բարեփոխումների հանրաքվեի վրա
Aravot.am-ը հոկտեմբերի 28-ին «Ելակետ» մամուլի ակումբում քաղաքագետ Գագիկ Համբարյանից հետաքրքրվեց, թե արդյոք դեկտեմբերի 6-ին կայանալիք հանրաքվեի ժամանակը սահմանում լարվածություն սպասվո՞ւմ է:
Քաղաքագետը նկատեց, որ նոյեմբերի 1-ին ե՛ւ Թուրքիայում, ե՛ւ Ադրբեջանում ավարտվում են ներպետական ընտրությունները, երկու երկրներում էլ տեղի են ունենալու օրենսդիր մարմնի ընտրություններ. «Իրենք ավելի ազատ կլինեն իրենց գործունեության մեջ, քան Հայաստանի իշխանությունները, որոնք ավելի սեւեռված կլինեն ներքաղաքական խնդիրներին՝ կոնկրետ սահմանադրության բարեփոխումներին, բայց իրականում ես համարում եմ, որ սա նոր Սահմանադրության ընդունում է, քանի որ Հայաստանում լիովին փոխվում է քաղաքական կառավարման համակարգը: Այսինքն՝ մենք կիսանախագահական, կիսապառլամենտական համակարգից վերածվում ենք պառլամենտական հանրապետության»:
Գագիկ Համբարյանը նկատեց, որ ադրբեջանական կողմը բացարձակ չի էլ թաքցնում, որ ինքն է սահմանում իրավիճակը սրում. «Ես չեմ գտնում, որ եթե Ադրբեջանը չխախտի զինադադարը հայ-ադրբեջանական սահմանին, Հայաստանը կարող է խախտել, կամ Թուրքիան կարող է ազդեցություն ունենալ մեր սահմանի վրա, որպեսզի ազդեցություն ունենա Հայաստանում սպասվող սահմանադրական բարեփոխումների հանրաքվեի վրա»:
Կարդացեք նաև
Ամի ՉԻՉԱԿՅԱՆ
