Կրթության և գիտության նախարարությունում այսօր ներկայացվեցին նախարարության պատվերով իրականացված «ՀՀ ուսանողների կենսաոճի և Բոլոնիայի գործընթացի գնահատման հետազոտության» երկրորդ՝ «Ուսանողների հասարակագիտական գիտակցությունը» հատվածի արդյունքները: «Ուսանողը նաեւ ՀՀ քաղաքացի է, ուստի իրականացրել ենք այս հետազոտությունը պարզելու համար ուսանողների հասարակաքաղաքական գերակայությունները եւ վարքի առանձնահատկությունները՝ երկրում ընթացող գործընթացների առնչությամբ»,-ասաց նախարար Արմեն Աշոտյանը:
Ներկայացնելով հետազոտության արդյունքները՝ վերլուծաբան Սամվել Մանուկյանն ասաց, որ ուսանողներին առաջնահերթ հարցրել են՝ որոնք են Հայաստանի կարևորագույն խնդիրները. «Ուսանողության կարծիքով՝ դա գործազրկությունն է(25.3%), այնուհետեւ՝ աղքատությունը(20.0%), երկրի անվտանգությունը(19.8%), տնտեսական թերզարգացածությունը(19.6%) եւ արտագաղթն ու արտագնա աշխատանքի մեկնումները(19.3%): Հետաքրքիր է, որ այս խնդիրները գրեթե բոլոր սոցիոլոգիական հետազոտություններում առաջնահերթություններ են, իսկ օրինակ ժողովրդավարությունը կամ տնտեսական հարցերը դիտվում են որպես 2-րդ եւ 3-րդ կարգի խնդիրներ»:
Հարցված ուսանողների 27.7%-ն ասել է, թե աղքատության և անհավասարության հիմնական պատճառը անարդարությունն է, իսկ 12.1%-ի կարծիքով՝ անհավասարության հիմնական պատճառը երկրում տիրող աղքատությունն է: «Երբ երկիրը հարստանա՝ այդ խնդիրները կլուծվեն»,-ընդգծել են նրանք:
«33.0%-ի խոսքով՝ հարուստներն ու իշխանություն ունեցողները անպատիժ խախտում են օրենքները, քանի որ համոզված են՝ ով էլ գա իշխանության` կխախտի օրենքները: Իսկ ուսանողների 66.6%-ը չի կիսում այդ տեսակետը»,-նշեց Սամվել Մանուկյանը:
Կարդացեք նաև
Արմեն Աշոտյանն էլ իր հերթին նկատեց՝ մամուլը սովոր է գրել, որ ուսանողությունը քաղաքականացված եւ կուսակցականացված է, մինչդեռ ըստ հետազոտության՝ կուսակցության անդամ հանդիսանալու ցուցանիշը 2 անգամ ավելի փոքր է (6.8%), քան ամբողջ հասարակությունում (12.3%): Ուսանողների 29%-ն էլ այս կամ այն կերպ մասնակցել է քաղաքացիական նախաձեռնություններին:
Հիշեցնենք, որ «ՀՀ ուսանողների կենսաոճի և Բոլոնիայի գործընթացի գնահատման հետազոտության» առաջին՝ «Բոլոնյան գործընթացի ընդհանուր գնահատականներ» հատվածը հրապարակվել է 2015թ.-ի սեպտեմբերի 8-ին:
Լուիզա ՍՈՒՔԻԱՍՅԱՆ
«Երբ երկիրը հարստանա՝ այդ խնդիրները կլուծվեն»
Ո՛չ, երբ այդ խնդիրները լուծվեն, այ ա՛յդ ժամանակ երկիրը կհարստանա: