ՀԱԿ խմբակցության պատգամավոր Լյուդմիլա Սարգսյանի հայտարարությունը խորհրդարանում
Մի քանի ամիս է, ինչ ղարաբաղա-ադրբեջանական և հայ-ադրբեջանական սահմաններին լարված իրավիճակ է: Ադրբեջանը դիպուկահարների կրակոցները և դիվերսիոն սադրանքներն արդեն սկսել է զուգակցել ծանր սպառազինության օգտագործման հետ` գնդակոծելով և հրթիռակոծելով ոչ միայն հայ սահմանապահների դիրքերը, այլև թիրախ դարձնելով սահմանամերձ գյուղերը և խաղաղ բնակչությանը: Ադրբեջանական սադրանքների արդյունքում, ցավոք, հնարավոր չի եղել խուսափել զոհերից: Այդուհանդերձ հայոց բանակի խիզախ և վճռական գործողությունների շնորհիվ հակառակորդի ակտիվությունն առայժմ կասեցվում է, ադրբեջանական զինուժին պատճառվում են մարդկային և տեխնիկական մեծ կորուստներ: Որպես արդյունք՝ ռազմական հավասարակշռությունը սահմանին պահպանվում է, և թույլ չի տրվում լարվածության հետագա աճ:
Ադրբեջանի նման սանձարձակ գործողություններն ունեն մի շարք պատճառներ:
Դրանցից մեկն Ադրբեջանի հարաբերությունների վատթարացումն է Արևմուտքի հետ, ինչն Ադրբեջանի դիվանագիտության տապալման արդյունք է:
Կարդացեք նաև
Ադրբեջանի տնտեսության անկման հետևանքով, կտրուկ մեծացել են հակաԱլիևյան տրամադրությունները: Ադրբեջանցիների ուշադրությունը ներքաղաքական խնդիրներից շեղելու և սեփական վարկանիշը պահպանելու նպատակով Ալիևը և նրա քաղաքական խմբավորումը դիմում են նման սադրանքների:
Սահմանային լարվածության աճի պակաս կարևոր պատճառ չէ նաև Հայաստանի ներքին բարդ իրավիճակը: Սոցիալ-տնտեսական ծանր իրողությունը, ահագնացող արտագաղթը, գործազրկությունը, կոռուպցիան, մենաշնորհները և Հայաստանի հասարակությունն ու պետությունը ջլատող մյուս գործոնները մեծ հարված են հասցնում Հայաստանի ազգային անվտանգությանը, թուլացնում մեր հայրենիքի դիմադրողականությունը:
Պետության մարտունակությունն ու անվտանգությունը պայմանավորված է ոչ միայն կայացած և հզոր բանակով. այլև հասարակության բարեկեցությամբ, սոցիալական արդարությամբ, հասարակության ներքին համերաշխությամբ և բազմաթիվ այլ գործոններով:
Կոչ ենք անում իշխանություններին ձեռնարկել արմատական բարեփոխումներ, մեղմել մեր կողմից թվարկված արատավոր երևույթները, ինչը կբարելավի բարոյահոգեբանական մթնոլորտը և միանշանակ կբերի արտագաղթի տեմպերի նվազմանը: Արտաքին քաղաքականությունը ներքին քաղաքականության շարունակությունն է. չի կարող արտաքին ճակատում ամեն ինչ լավ լինել, եթե չեն լուծվել երկրի ներքին խնդիրները:
Բարեփոխված, ուժեղ, բարեկեցիկ Հայաստանի նկատմամբ ագրեսիա գործադրելուց առաջ Ադրբեջանն արդեն հազար անգամ կմտածի և կձգտի հասնել կոմպրոմիսների, այլ ոչ ղարաբաղյան հարցի ուժային լուծման:
