Այսպիսի կարծիք հայտնեց Հայաստանի մաս-ռեսթլինգի ֆեդերացիայի նախագահ Արտավազդ Նալբանդյանը՝ ՀՀ ֆինանսների նախարարության մարզահամալիրում անցկացված մաս-ռեսթլինգի Եվրոպայի բաց առաջնության եւ աշխարհի գավաթի 2-րդ փուլի ավարտից հետո, որտեղ Հայաստանի տղամարդկանց եւ կանանց հավաքականները ութ երկրների պայքարում ընդհանուր առմամբ նվաճեցին 1 ոսկե, 3 արծաթե եւ 8 բրոնզե մեդալ:
Aravot.am-ի հետ զրույցում ֆեդերացիայի նախագահն անակնկալի եկած ասաց. «Հայաստանում սպորտը զարգանում է: Մենք Եվրոպայի բաց առաջնություն եւ աշխարհի գավաթի փուլ ենք անցկացնում, բայց դահլիճը կիսադատարկ է: Մինչդեռ, դրա համար, կարծես, ամեն ինչ արել էինք: Ստացվում է, որ հայ ազգը չի ցանկանում իրեն խրախճանքներից զրկել, գալ ու սեփական հարկի տակ իր մարզիկներին ոգեւորել, աջակցել: Այս երկու օրվա ընթացքում ինձ ամենաշատը անակնկալ են պատճառել թեկուզ հենց իմ ընկերները, որոնք համացանցում չորս հազարից ավելի են: Ես բոլորին էլ մի քանի անգամ գրել եմ: Եթե միայն նրանց 20 կամ 10 տոկոսը գար, դահլիճը լեցուն կլիներ»:
Աշոտ ՀԱԿՈԲՅԱՆ
