ՀԱԿ խմբակցության պատգամավոր Գագիկ Ջհանգիրյանը ԱԺ-ում 2014-ի զեկույցը ներկայացնող Մարդու իրավունքների պաշտպան Կարեն Անդրեասյանին հարց ուղղեց. «Դուք երիտասարդ իրավաբան եք, հարյուրավոր խնդիրներ եք բարձրացրել ձեր գործունեության ընթացքում եւ խոստովանում եք, որ դրանցից քչերն են լուծումներ ստանում, ուղղակի արձանագրում եք: Ես ենթադրում եմ, որ ձեր աշխատանքից հաճույք չեք ստանում, որովհետեւ չեք կարողանում կոնկրետ խնդիրը լուծել: Այսինքն, ձեր մեկնաբանմամբ չունեք այդպիսի լծակներ: Դուք ցանկություն չե՞ք ունենում հրաժարական տալ»:
Կարեն Անդրեասյանը պատասխանեց, որ նման ցանկություն ամենեւին չի ունենում. «Կարծում եմ, որ շատ քչերը, իմ ճանաչած իրավաբաններից չի լինի մեկը, որ կարող էին սա անել նույնքան արդյունավետ՝ ներկայիս օրենսդրական հասարակական պատմական ժամանակաշրջանի համար»:
Նա ասաց, որ երբ կլինի նման մեկը, ով կունենա կոնկրետ ծրագրեր, թե ինչ անել այս իրավիճակում՝ կսկսի մտածել հրաժարականի մասին:
Ինչ վերաբերում է հաճույք ստանալուն՝ Կարեն Անդրեասյանն ասաց. «Եթե այս դառը աշխատանքը կարող է որեւէ մեկին հաճույք պատճառել, այդ հաճույքի բավարարումը ես ունեցել եմ եւ ասեմ ինչում է կայացել՝ 100 մարդուց եթե գոնե մեկին կարողանում ես օգնել, դա այնքան հաճույք է պատճառում, որ կարողանում է փակել բոլոր մյուս դժվարությունները»:
Կարդացեք նաև
Նա մաղթեց դահլիճում ներկա պատգամավորներին, որ կարողանան զգալ այդ հաճույքը՝ օրվա մեջ գոնե մեկին իրական օգնություն ցույց տալու:
Հռիփսիմե ՋԵԲԵՋՅԱՆ
