ԵԱՀԿ Մինսկի խմբի ամերիկացի համանախագահ Ջեյմս Ուորլիքի տեղեկացմամբ` Հայաստանի և Ադրբեջանի նախագահների հանդիպում հավանաբար տեղի կունենա դեկտեմբերի 6-ի հանրաքվեից հետո: Այսօր ՀՀ ԱՄՆ դեսպանատանը հրավիրված մամուլի ասուլիսին պարոն Ուորլիքն այս առիթով ասաց. «Հանդիպման անհրաժեշտություն այս պահին կա, բայց դա հավանաբար տեղի կունենա Հայաստանում անցկացվելիք` դեկտեմբերի 6-ի հանրաքվեից հետո: Իհարկե, մինչև տարեվերջ կարճ ժամանակ է մնում, սակայն պետք է հասցնենք: Պետք է նայենք երկու նախագահների գրաֆիկը»:
Դառնալով շփման գծում լարվածության պահպանմանը` Ջեմս Ուորլիքն ասաց. «Մեզ անհանգստացնում է այն, որ այժմ սահմանին օգտագործվում են մեծ նռնականետեր և ծանր զինամթերք, դրանք կարող են կործանարար արդյունք ունենալ: Երկու տարի առաջ հիմնականում դիպուկահարների խնդիրն էր, այժմ իրավիճակն ավելի վտանգավոր է դարձել. զոհվում են խաղաղ բնակիչներ կանայք և տղամարդիկ,: Կուզեի, որ կողմերը պարտավորություն ստանձնեին այդպիսի զինատեսակների օգտագործումից զերծ մնալ, հակառակ դեպքում կա լարվածության մեծացման ռիսկ: Պետք է հարգել հրադարարն ու բանակցությունների ընթացքը»:
Տաթև ՀԱՐՈՒԹՅՈՒՆՅԱՆ
Կարդացեք նաև
