Բրեդլի Բուզետո. Հայաստանից արտագաղթում են, քանի որ «ապագայի հեռանկարներ չեն տեսնում». «Ազատություն» ռադիոկայան

Արտագաղթը լուրջ խնդիր է, և կարևոր է, որ Հայաստանի իշխանությունները լուծեն այդ հարցը, «Կիրակնօրյա վերլուծական Թամրազյանի հետ» հաղորդման եթերում այսօր հայտարարեց Հայաստանում ՄԱԿ-ի գրասենյակի ղեկավար Բրեդլի Բուզետոն։

«Արտագաղթը իրական խնդիր է Հայաստանում: Հայաստանը միակ երկիրը չէ, որ նման խնդրի առաջ է կանգնած: Այս տարածաշրջանի այլ երկրներ նույնպես այս խնդիրն ունեն: Եվ անկեղծ ասած, այս խնդիրը միայն տնտեսությամբ չի պայմանավորված: Այդ մարդիկ իրենց հասարակության մաս չեն զգում, նրանք իրենց ապագայի հեռանկարներ չեն տեսնում: Դա, ինչ-որ առումով, ավելի խորը խնդիր է», – նշեց Բուզետոն՝ հավելելով. – «Սա բարդ խնդիր է, և կարծում եմ` մենք պետք է հարցի լուծմանը մոտենանք տարբեր կողմերից, պետք է պայմաններ ստեղծվեն ոչ միայն տնտեսության զարգացման, այլ նաև սոցիալական զարգացման համար: Մենք իշխանությունների և մեր գործընկերների հետ աշխատանքներ ենք տանում այս ուղղությամբ»:

Միգրացիայի հետ կապված խնդիրների համատեքստում Բրեդլի Բուզետոն կարևոր համարեց հիշատակել ներգաղթողներին, նշելով, որ բացի հայաստանցիներից, ովքեր ժամանակին հեռացել են և այժմ վերադառնում են, կան նաև շուրջ 17 հազար սիրիահայեր, ովքեր եկել են Հայաստան։

Հրայր Թամրազյան

Նյութի մանրամասները կարդացեք «Ազատություն» ռադիոկայանի  կայքում