«Շատ կարեւոր է, որ մարդիկ իրազեկ լինեն եւ հասկանան, թե առաջարկվող փոփոխությունները, ինչ են փոխելու իրենց կյանքում»,- հոկտեմբերի 23-ին Մարդու իրավունքների պաշտպանի գրասենյակի կազմակերպած «Մարդու իրավունքները Սահմանադրության նոր նախագծում» խորհրդաժողովից հետո լրագրողների հետ զրույցի ընթացքում ասաց Հայաստանում ԱՄՆ դեսպան Ռիչարդ Միլսը:
Նա կարեւորում է նաեւ, որ բոլոր կողմերի ձայնը լսելի լինի, բոլորը հնարավորություն ունենան օգտվել լրատվամիջոցներից. «Մենք ցանկանում ենք տեսնել բաց բանավեճ, քննարկումներ, որ մարդիկ կարողանան իրենց որոշումը կայացնել: Եվ եթե որոշում են փոփոխություններ կայացնել, ապա դա նրանց որոշումն է: Մենք՝ որպես Հայաստանի բարեկամ, հետեւելու ենք՝ տեսնելու արդյոք ապահովվո՞ւմ է բաց բանավեճ, արդյոք «Այո» եւ «Ոչ» ճակատները ներկայացնող երկու կողմերը կարողանում են իրենց դիրքորոշումը հավասար հայտնել»:
Դեսպանը նշեց, որ առաջարկվող նախագիծը մասամբ ընթերցել է եւ ծանոթացել է Վենետիկի հանձնաժողովի եւ հայաստանյան հասարակական կազմակերպությունների տված գնահատականներին. «Ինձ համար՝ որպես Միացյալ Նահանգների ներկայացուցչի, տեղին չէ որեւէ գնահատական տալ նախագծին: Հայաստանի ժողովուրդը պետք է ծանոթանա նախագծին, մասնակցեն բանավեճերին, հասկանան, թե ինչպես կարող է դա անդրադառնալ իրենց կյանքին եւ իրազեկ որոշում կայացնեն»:
Ամի ՉԻՉԱԿՅԱՆ
