Այսօր ԱԺ պետաիրավական հարցերի հանձնաժողովի նիստում քննարկվեց նաեւ Ժառանգություն խմբակցության անդամ Թեւան Պողոսյանի` «ԱԺ կանոնակարգ օրենքում» փոփոխություններ եւ լրացումներ կատարելու մասին նախագիծը: Թեւան Պողոսյանն առաջարկում է, որ ՀՀ Կառավարություն- ԱԺ հարցուպատասխանի ժամանակ, գործադիրի անդամներին առաջինը բանավոր հարցերն ուղղվեն, հետո նոր գրավոր:
Հիշեցնենք, որ այս խնդրի հետ կապված մշտապես խորհրդարանում դժգոհություններ են լինում: Նաիրա զոհրաբյանը նույնիսկ հեգնել էր, որ պատգամավորները գրավոր հարց են ուղղում կառավարությանը՝ ճի՞շտ է, որ տերեւը կանաչ է, հետո կառավարությունը պատասխանում է, որ այո, կանաչ է, ԱԺ-ում նորից բարձրաձայնում են նույն հարցը, նորից ստանում պատասխան, հետո՝ շնորհակալություն, որ ասացիք, որ տերեւը կանաչ է:
Որպեսզի այդ խնդիրը լուծվի, Թեւան Պողոսյանը գտնում է, որ պետք է ոչ թե գրավոր հարցերը հնչեցնելն արգելեն, ինչպես առաջարկում էին որոշ ընդդիմադիրներ,այլ սկզբում բանավորները տան, հետո, եթե ժամանակ մնաց՝ գրավորները:
Հանձնաժողովը նախագծին դրական եզրակացություն տվեց եւ արդեն ԱԺ քառօրյա նիստերում կորոշվի՝ ընդունե՞լ այն, թե՞ ոչ:
Կարդացեք նաև
Հռիփսիմե ՋԵԲԵՋՅԱՆ
