Հարցազրույց ԼՂՀ նախագահի մամուլի խոսնակ ԴԱՎԻԹ ԲԱԲԱՅԱՆԻ հետ
-Մեկ ամիս առաջ ԱՄՆ կոնգրեսականները 3 կետից բաղկացած ծրագիր առաջարկեցին ԵԱՀԿ Մինսկի խմբի համանախագահներին. հասնել նրան, որ դիպուկահարները հետ քաշվեն շփման գծից, ավելացվի ԵԱՀԿ դիտորդների քանակը, տեղադրվեն տեխնիկական միջոցներ, որոնք կտեսագրեն ողջ տեղաշարժը շփման գծի երկայնքով: Երկու օր անց համանախագահները կժամանեն տարածաշրջան, կլինեն նաեւ ԼՂՀ-ում, արցախյան կողմն իր հերթին կբարձրացնի՞ այս հարցերը, եւ ի՞նչ սպասելիքներ ունեք դրանց իրականացման առնչությամբ:
-Ընդհանրապես, երբ համանախագահները գալիս են Արցախ, մենք քննարկում ենք տարբեր հարցեր` ընթացիկ, իրավիճակային, նաեւ նոր զարգացումների ու ակնկալիքների մասին, հատուկ ուշադրություն է դարձվում սահմաններին տիրող իրավիճակին: Այս անգամ եւս կխոսվի Ադրբեջանի ապակայունացնող քայլերի մասին:
Պաշտոնական Ստեփանակերտը մի շարք կարեւոր առաջարկներ է ներկայացրել. կետերից մեկը դարձյալ վերաբերում է դիպուկահարների հետքաշմանը: Բայց արդեն դիպուկահարների հետքաշման մասին խոսելիս այլ հարցեր եւս առաջ են գալիս:
Կարդացեք նաև
Բանն այն է, որ Ադրբեջանը այժմ ավելի քիչ է օգտագործում դիպուկահարներին, չնայած նրանք դարձյալ սահմանին են, բայց հակառակորդն ավելի շատ զինադադարի ռեժիմը խախտում է օգտագործելով խոշոր տրամաչափի զինատեսակներ` ականանետներ, թուրքական հրթիռային համակարգեր: Եվ համանախագահների հետ պետք է անպայմանորեն խոսենք Բաքվի կողմից նման զենքերի կիրառման անթույլատրելիության մասին: Ադրբեջանն իր վրա վերցրել է պարտավորություն` 1994-ին ստորագրելով Բիշքեկյան համաձայնագիրը, ուր նշված է, որ պետք է պահպանվի զինադադարի ռեժիմը:
Շփման գծում ԵԱՀԿ դիտորդների քանակի ավելացման, տեխնիկական սարքավորումների տեղադրման հարցերը եւս կդառնան քննարկման առարկա: Բայց որպեսզի «քաղաքական կիկոսություն» չլինի, պետք է, որ Ադրբեջանը եւս համաձայնվի այս բոլոր քայլերի կատարմանը: Բայց նրանք չեն համաձայնվում, ու խնդիրը հենց դա է:
ԼՂՀ-ն Ադրբեջանին առաջարկեց սահմանին հաստատել լռության օրեր, հատկապես հոգեւոր, ազգային, միջազգային տոների ժամանակ: Բայց Ադրբեջանը դա էլ մերժեց: Այսօր էլ գրեթե կասկած չունեմ, որ Բաքուն կմերժի տեսագրող սարքերի տեղադրման առաջարկը: Ադրբեջանի նման պահվածքը մեկ անգամ եւս ապացուցում է, թե ով է մեղավորը, ով է խախտում հրադադարը, ով է իրական պատասխանատուն:
Այնուհանդերձ մենք մեր առաջարկներն անելու ենք։
ԱՐՄԻՆԵ ՍԻՄՈՆՅԱՆ
Հոդվածն ամբողջությամբ կարող եք կարդալ «Հայոց աշխարհ» թերթի այսօրվա համարում
