Ադրբեջանի գլխավոր դատախազությունը հոկտեմբերի 22-ին հաղորդագրություն է տարածել, որ դիմել են Շվեյցարիայի գլխավոր դատախազին, որպեսզի վերջինս քրեական հետապնդում իրականացնի Շվեյցարիայի քաղաքացի, «Ֆրանկ Մյուլեր Գրուփ» ընկերության ղեկավար Վարդան Սրմաքեշի նկատմամբ:
«Azernews»-ի տեղեկացմամբ՝ Ադրբեջանի գլխավոր դատախազությունը, մասնավորապես, նշել է, թե Սրմաքեշը մի խումբ անձանց հետ անօրինական տնտեսական գործունեություն է ծավալում «Ադրբեջանի օկուպացված տարածքներում» եւ այդ տարածքներում միջազգային մակարդակով գովազդում է «անօրինական ռեժիմը»:
Վարդան Սրմաքեշի նկատմամբ Ադրբեջանում քրեական գործ է հարուցվել սահմանը ապօրինի հատելու եւ չարակամ գործողություն կատարելու մեջ, որոնք վտանգում են Ադրբեջանի տարածքային ամբողջականությունը եւ ինքնիշխանությունը: Ադրբեջանը Շվեյցարիայից խնդրում է օգնել Սրմաքեշին քրեական պատասխանատվության ենթարկել:
Այս առնչությամբ Aravot.am-ը մեկնաբանություն խնդրեց Լեռնային Ղարաբաղի Հանրապետության վարչապետի մամուլի քարտուղար Արտակ Բեգլարյանից: Պարոն Բեգլարյանը, մասնավորապես, ասաց, որ Վարդան Սրմաքեշը տնտեսական գործունեություն է ծավալում Արցախում բավականին երկար ժամանակ, դա երբեք գաղտնիք չի եղել. «Նույնիսկ մի քանի անգամ կառավարության հաղորդագրություններով էլ ներկայացրել ենք իր այցերն ու վարչապետի հետ հանդիպումները»:
Կարդացեք նաև
Արտակ Բեգլարյանից նաեւ հետաքրքրվեցինք, թե Ադրբեջանի այս դիմումը Շվեյցարիայի գլխավոր դատախազին, կարո՞ղ է ազդեցություն ունենալ Արցախում գործարարի ծավալած գործունեության վրա։ ԼՂՀ վարչապետի մամուլի քարտուղարն ի պատասխան ասաց. «Ես համոզված եմ, որ ոչ: Տեղյակ լինելով իր գործունեությունից՝ նույնիսկ կարծում եմ, որ սա լրացուցիչ խթան կլինի նրա համար ավելի հետևողականորեն աշխատել Արցախում ներդրումային ծրագրերի վրա»:
Աշոտ ԻՍՐԱԵԼՅԱՆ
