Վարչական դատարանում հոկտեմբերի 22-ին դատավոր Կարեն Զարիկյանի նախագահությամբ շարունակվում էր մի խումբ քաղաքացիների եւ «Էկոդար» եւ «Էկոլոգիական իրավունք» հասարակական կազմակերպությունների հայցն ընդդեմ բնապահպանության եւ էներգետիկայի եւ բնական պաշարների նախարարության: Գործով երրորդ կողմ է ճանաչվել «Գեոթիմ» ՓԲԸ-ն:
Դատական նիստին ներկա չէր բնապահպանության նախարարության ներկայացուցիչը: Հայցվորների ներկայացուցիչ Հայկ Ալումյանը նշեց, որ ստացել է էներգետիկայի եւ բնական պաշարների նախարարության պատասխանը, սակայն պատասխանին կցված չեն եղել օրենքով սահմանված փաստաթղթերը՝ այն փաստաթղթերի պատճենները, որոնք նրանք ներկայացրել են դատարան: Արդյունքում՝ հայցվոր կողմը չի տիրապետում այն ապացույցներին, որոնք պատասխանող կողմը հարկ է համարել ներկայացնել դատարան:
Հայկ Ալումյանը հայտարարեց, թե կարծում է, որ գործով պատշաճ պատասխանողը էներգետիկայի եւ բնական պաշարների նախարարությունն է, իսկ բնապահպանության նախարարության դեմ հայցի այն մասերն էին, որոնք չեն ընդունվել:
Նա միջնորդեց հետաձգել նախնական դատական նիստը, քանի որ հայցը վերաձեւակերպելու անհրաժեշտություն կա եւ պատասխանող կողմը պետք է տրամադրի դատարանին ներկայացված փաստաթղթերը. «Մենք երրորդ պահանջը հիմնել էինք առաջին երկրորդ պահանջների վրա, մենք պետք է որոշ չափով վերախմբագրենք հայցապահանջը: Տրամադրել փաստաթղթերի պատճենները»:
Կարդացեք նաև
Դատական նիստը հետաձգվեց:
Ամի ՉԻՉԱԿՅԱՆ
