ՀՀԿ խմբակցության պատգամավոր Կարինե Աճեմյանը կարծում է, որ սահմանադրական բարեփոխումների բավական բարելավված նախագիծ է դրված հանրաքվեի: Այսօր այդ մասին նա հայտարարեց «Հենարան» մամուլի ակումբում` հավելելով, որ ամենակարեւորը նոր համակարգին անցումն է, որը խորացնելու է մեր երկրում ժողովրդավարությունը: «Նոր գործիքներ են ներդրվելու, որոնք նաեւ ընդդիմությանը կուժեղացնեն»,- ասաց նա` հավելելով, որ դատական ատյանների անկախությունն էլ է ապահովվելու:
Դա խիստ դուր չեկավ մյուս բանախոս Ստեփան Սաֆարյանին: Վերջինս կարծում է, որ փոխվել է ամեն ինչ, բացի նրանից, ինչը պետք էր փոխել ու ապահովել դատական համակարգի անկախությունը: Ստեփան Սաֆարյանն առաջարկում է, որ դատավորներին էլ մարդիկ ընտրեն`այնպես, ինչպես, օրինակ, պատգամավորներին են ընտրում: Կարինե Աճեմյանը չի պատկերացնում` ինչպե՞ս է դա հնարավոր:
«Բացի ֆոտոսեսիաներից, ես բովանդակային բան չտեսա, անգամ քննարկումներում իմիտացիան եւ ձեւն ավելի կարեւոր են եղել, քան բովանդակությունը»,- ասաց Ստեփան Սաֆարյանը:
Կարինե Աճեմյանը համամիտ չէ. «Նույնիսկ շատ արմատական ընդդիմադիրներ առաջարկներ են ներկայացրել եւ անցել են, ի զարմանս իրենց»:
Կարդացեք նաև
Լրագրողներից մեկը նկատեց, որ եթե անգամ իմիտացիա եղել է, ուրեմն ընդդիմադիրներն են այդ իմիտացիան ստեղծել, քանի որ գնացել են նախագահի մոտ հանդիպումների, առաջարկներ են ներկայացրել մասնագիտական հանձնաժողովին: Ստեփան Սաֆարյանը խնայեց ընդդիմադիր գործընկերներին` նկատելով, որ իշխանությունն իրականում չի փորձում առկա խնդիրներին լուծում տալ, այլ տարբեր «խուճուճ-մուճուճ» ձեւերով փորձում է իր ձեռքում պահել կառավարման լծակները:
«Ձեր առաջարկը ներկայացնեիք, միգուցե ընդունվեր»,- Ստեփան Սաֆարյանին դիմեց Կարինե Աճեմյանը: «Հույս ունեի, որ դուք կներկայացնեիք ԳՄ նիստում»,- հումորով արձագանքեց Ստեփան Սաֆարյանը:
ՀՀ-ն ԵՄ-ի հետ դինամիկ աշխատում է, նոր փաստաթուղթ պիտի ստորագրվի, այս համատեքստում էլ, ըստ Կարինե Աճեմյանի, սահմանադրական բարեփոխումները դրական հեռանկար կարող են արձանագրել մեր երկրի համար:
Նելլի ԳՐԻԳՈՐՅԱՆ
