Ի՞նչ են դրանք իրականում նշանակում
Omgfacts.com-ն առանձնացրել է ամենատարածված 10 մղձավանջները եւ բացատրել դրանց նշանակությունը.
1. Թակարդում կամ ինչ-որ տեղ փակված լինելը
Երազում թակարդում լինելը ցույց է տալիս հուսախաբությունը, որ դուք ունենում եք իրական կյանքում եւ չեք հավատում, որ ինչ-որ ձեւով կարող եք փոխել իրավիճակը: Օրինակ՝ դուք կարող եք դժգոհ լինել ձեր աշխատանքից, ընտրած մասնագիտությունից եւ այլն:
2. Դավաճանված լինելը
Դավաճանությունը երազներում նշանակում է, որ դուք ձեզ օտարված, մեկուսացված ու լքված եք զգում ձեզ համար սիրելի ինչ-որ մեկի կողմից:
3. Մահանալը
Մահը երազում նոր սկիզբ է նշանակում: Սա նշան է, որ ձեր կյանքում անհաջողությունների շրջանը վերջանում է եւ ձեզ նոր սկզբի հնարավորություն տալիս:
4. Կորած լինելը
Այս մղձավանջը սովորաբար այցելում է այն ժամանակ, երբ դուք իրական կյանքում անհանգստություն, շփոթմունք եւ հուսախաբություն եք զգում: Օրինակ՝ երբ իրական կյանքում նոր աշխատանքի եք անցնում կամ նոր քաղաք եք տեղափոխվում:
5. Վնասված լինելը
Եթե երազում ձեզ վնասված եք տեսնում, սովորաբար կապվում է մի իրավիճակի հետ, որտեղ դուք ձեզ անօգնական ու անզոր եք զգում:
6. Ատամ կորցնելը
Երազում ատամ կորցնելը անվստահության կամ դեպրեսիայի նշան է: Դա նաեւ նշան է, որ իրական կյանքում մի այնպիսի իրավիճակ է ստեղծվել, որը ստիպում է ձեզ անինքնավստահ ու անօգնական զգալ, այդ թվում՝ ծերացումը եւ գիտակցելը սեփական մահկանացու լինելը:
7. Մերկ լինելը
Երազում մերկ լինելը նշանակում է ինչ-որ բանի կամ ինչ-որ մեկի հանդեպ ամոթ զգալ կամ խոցելի լինել: Դա նշանակում է, որ ձեզ վախեցնում է մարդկանց ուշադրությունը գրավել ինչ-որ բանի վրա, որը դուք փորձում եք թաքցնել, ինչի արդյունքում դուք կարող եք կորցնել ձեր հեղինակությունը:
8. Քննությունը ձախողելը
Երազում քննություն ձախողելը նշանակում է, որ իրականում անցյալում, ներկայում կամ ապագայում անհանգստություն եք ունեցել քննությունը ձախողելու: Քննությանը անպատրաստ լինելը նշանակում է, որ դուք ձեզ պատրաստ չեք զգում առաջիկայում ձեզ սպասվող մարտահրավերներին: Դա խոսում է այն վախի մասին, որ դուք հնարավոր է՝ չարդարացնեք մարդկանց սպասումները եւ հիասթափեցնեք նրանց:
9. Փախչելը կամ հետապնդված լինելը
Երազում ինչ-որ մեկի կողմից հետապնդված լինելը իրականում նշանակում է, որ դուք ինչ-որ նպատակ եք հետապնդում, իսկ այս մղձավանջը հուշում է հնարավոր դժվարությունների մասին: Դա կարող է նաեւ նշանակել, որ դուք ինքներդ ձեր կողմից եք հետապնդվում, ինչը ցույց է տալիս, որ դուք դեռ չեք հաշտվել ինչ-որ բանի հետ: Հնարավոր է՝ դա նաեւ ինչ-որ մեկի հանդեպ զայրույթ կամ նախանձ ունենալու նշան լինի:
10. Ընկնելը
Սա ամենատարածված մղձավանջն է: Ընկնելը, հավասարակշռությունը կորցնելը կամ սայթաքելը խոսում է իրադրության վերահսկողությունը ձեռքից բաց թողնելու վախի մասին: Դա վկայում է ինչ-որ բանի հանդեպ ունեցած անհանգստության մասին, երբ զգում եք, որ կորցնում եք իրադրությունը շտկելու կամ փոխելու հնարավորությունը:
Պատրաստեց ՆՈՒՆԵ ՂԱԶԱՐՅԱՆԸ
«Առավոտ» օրաթերթ
21.10..2015
