Կամերային երաժշտական թատրոնում այսօր առաջին անգամ ցուցադրվեց «Հույսի կամուրջ» հասարակական կազմակերպության թատերախմբի ներառական ներկայացումը: Թատերախմբի անդամները, այդ թվում՝ սահմանափակ կարողություններով պատանիներ, բեմադրեցին հայկական ժողովրդական հեքիաթների հիման վրա ստեղծված «Ծուռն ու շիտակը» ներկայացումը:
«Մեր առաքելությունն է՝ երեխաներին օգնել ձերբազատվել մի շարք բարդույթներից, կրթել նրանց թատրոնի միջոցով եւ փոխել հասարակության վերաբերմունքը հաշմանդամություն ունեցողների հանդեպ: Կարելի է ասել, որ դա հաջողվել է: Առաջին ներկայացման ժամանակ մարդիկ սայլակով երեխա տեսնելուց հուզվում էին, լաց լինում, իսկ այսօր գալիս են պարզապես ներկայացում դիտելու: Շատ դժվարություններ ենք հաղթահարել, պարզապես մարդկանց պետք է ընդունել այնպիսին, ինչպիսին կան եւ զարգացնել նրանց ուժեղ կողմերը»,-Aravot.am-ի հետ զրույցում ասաց «Հույսի կամուրջ» ՀԿ թատերախմբի ղեկավար Հասմիկ Խաչերյանը:
Նա ցավով արձանագրեց, որ շատ շենք-շինություններ, այդ թվում՝ թատրոններ, հարմարեցված չեն հաշմանդամություն ունեցողների կարիքներին. բացառություն են Կամերային երաժշտական եւ Տիկինիկային թատրոնները:
Կարդացեք նաև
«Սա իմ 5-րդ ներկայացումն է: Ճիշտ է, տնտեսագիտություն եմ սովորում, բայց մանկուց երազել եմ բեմում խաղալ»,-մեզ հետ զրույցում ասաց թատերախմբի անդամ Արման Գրիգորյանը, ով մարմնավորում է գյուղացիներից մեկի կերպարը: Արմանի խոսքով՝ հանդիսատեսը հաշմանդամություն ունեցող երեխաների խաղին դրական է արձագանքում. «Գովում են մեզ եւ հիանում մեր խաղով: Այս ներկայացումը մեծ ասելիք ունի, վստահ եմ, որ մարդիկ մեծ տպավորություն կստանան»:
Հասմիկ Խաչերյանը տեղեկացրեց, որ առաջիկայում թատերախումբը մասնակցելու է «Նռան հատիկ» մանկապատանեկան փառատոնին, իսկ «Ծուռն ու շիտակը» ներկայացումը կցուցադրվի սահմանամերձ գյուղերում:
Հավելենք, որ թատերախմբի կազմում տարբեր տարիներին հանդես են եկել նաեւ փախստականների երեխաներ, իսկ այս պահին փոքրիկ դերասանների թվում են սիրիահայեր: Ի դեպ, տարածաշրջանում եզակի թատերախումբը 19 տարեկան է:
Մանրամասները` տեսանյութում
Լուիզա ՍՈՒՔԻԱՍՅԱՆ
