Հայրավանք, Գեղարքունիք։ «Ագրոբիզնեսի և գյուղի զարգացման կենտրոն» (CARD) հիմնադրամը ԱՄՆ Միջազգային զարգացման գործակալության (ԱՄՆ ՄԶԳ) ֆինանսավորմամբ իրականացվող ծրագրի շրջանակներում Գեղարքունիքի մարզի Հայրավանք համայնքում հիմնել է Գյուղատնտեսական և Անասնաբուժական Սպասարկման Կենտրոն:
Նոր մասնագիտացված կենտրոնը համայնքի անասնաբույժներին, ֆերմերներին և գյուղատնտեսությամբ զբաղվող անհատներին տրամադրելու է տեխնիկական և բիզնես օժանդակություն կենդանիների առողջության և անասնապահության հետ կապված հարցերում։
Կենտրոնի պաշտոնական բացումը տեղի է ունեցել ս.թ․ հոկտեմբերի 20-ին։ Բացման արարողությանը մասնակցել են՝ ՀՀ գյուղատնտեսության նախարար Սերգո Կարապետյանը, ԱՄՆ ՄԶԳ հայաստանյան գրասենյակի ղեկավար Քարեն Հիլիարդը, Գեղարքունիքի մարզպետ Ռաֆիկ Գրիգորյանը, ինչպես նաև ներկայացուցիչներ ԱՄՆ Միջազգային զարգացման գործակալությունից, CARD հիմնադրամից և Հայրավանք համայնքից:
Նոր կենտրոնը գյուղատնտեսական բիզնեսի առաջավոր մեթոդների զարգացման և տարածման համար տարածաշրջանային հանգույց է լինելու։ Այն զարգացնելու է տեղացի ֆերմերների հմտությունները և լավագույն փորձն է փոխանցելու բոլոր նրանց, ովքեր գյուղատնտեսական և անասնաբուժական, ինչպես նաև անասնաբուծական և անասնապահական ծառայություններ են տրամադրում: Կենտրոնը նպաստելու է նոր շուկայական կապերի զարգացմանը և աջակցելու է տարածաշրջանի ֆերմերներին ֆինանսական ծառայությունների հասանելիության գործում:
Կարդացեք նաև
Կենտրոնում հայ և օտարերկրյա մասնագետների կողմից անցկացվելու են աշխատաժողովներ և վերապատրաստման դասընթացներ: Նախատեսվում է, որ այն կսպասարկի Գեղարքունիքի մարզի 10 համայնքների 2,000-ից ավելի ֆերմերներին։
Այս կենտրոնն առաջինն է, որ հիմնվել է «Ագրոբիզնեսի և գյուղի զարգացման կենտրոն» (CARD) հիմնադրամի կողմից` ԱՄՆ ՄԶԳ ֆինանսավորմամբ իրականացվող «Հայաստանում մասնավոր խորհրդատվական ծառայությունների ստեղծում» (DPESSA) ծրագրի ներքո։ Գեղարքունիքի մարզում երկրորդ կենտրոնի բացումը նախատեսվում է հաջորդ շաբաթ` Վարդենիս համայնքում։
ԱԳՐՈԲԻԶՆԵՍԻ ԵՎ ԳՅՈՒՂԻ ԶԱՐԳԱՑՄԱՆ ԿԵՆՏՐՈՆ ՀԻՄՆԱԴՐԱՄ (CARD)
«Հայաստանում մասնավոր խորհրդատվական ծառայությունների ստեղծում» ծրագիր (DPESSA)
