2015 թվականը Հայաստանի տնտեսության համար դժվար տարի էր: Այս կարծիքին է տնտեսագետ Վարդան Բոստանջյանը:
Պարոն Բոստանջյանը չի շտապում 2015 թվականը գնահատել ցանկալի թվերով ու պայմանավորում է օբյեկտիվ և սուբյեկտիվ պատճառներով:
«Աշխարհաքաղաքական տարաբնույթ զարգացումներն, ըստ էության ունեցան էական ազդեցություն Հայաստանի վրա: Աշխարհաքաղաքական դիրքով գտնվում ենք բարդ տարածաշրջանում, դրան գումարած նաև այն, որ երկիրը հարուստ չէ ստրատեգիական ռեսուրսներով»,- այսօր «Փաստարկ» ակումբում ասաց Վարդան Բոստանջյանը:
Նրա խոսքով, 2016 թվականի բյուջեն հնարավոր է՝ չկատարվի. «8,6 միլիարդ դրամի չափով ավելի զուսպ պլանավորում ունենք, սա կառավարության կողմից ավելի զուսպ մոտեցում է: Մենք կունենանք դժվարություններ`ավելի մեծ եկամուտներ ունենալու դեպքում, բայց բոլոր դեպքերում ես հակված չեմ բացասական գույներով նկարագրելու այս ամենը: Իհարկե, կառավարման արդյունավետության տեսանկյունից դեռևս ունենք խոցելիություն, բայց պետք է հաշվի առնել այն, որ կան արտաքին ազդակներով պայմանավորված բացասական զարգացումներ, որոնք Հայաստանին զրկում են ավելի ճակատային զարգացումից»:
Կարդացեք նաև
Անդրադառնալով ԵՏՄ-ին Հայաստանի անդամակցության վերաբերյալ շարունակվող քննադատություններին՝ պարոն Բոստանջյանը նկատեց, որ ԵՏՄ-ն որպես այդպիսին դեռևս չի գործում. «Քաղաքական ճնշումների պայմաններում մենք հայտնվեցին ԵՏՄ-ում, բայց ԵՄ-ը հասկացավ, որ դրան բացասական նայել պետք չէ: Եվրոպական տարբեր կազմակերպություններից գալիս են մեսիջներ, որ մենք կարող ենք հարաբերություններ ունենալ նաև նրանց հետ… Եվ մենք իրավունք չունենք ասել՝ ԵՏՄ-ի հետ մեր հարաբերությունները առ ոչինչ են: Այդուհանդերձ, ԵՏՄ-ն 170 միլիոնանոց շուկա է և իրացման առումով լավ շուկա է: Ցանկացած տնտեսվարողի համար շուկա մտնելը սարսափելի դժվար է: Այսինքն՝ հաջողություններ գրանցելու համար ունենք մեծ հնարավորություններ»:
Արփինե ՍԻՄՈՆՅԱՆ
