Քաղաքագետ Հրանտ Մելիք-Շահնազարյանը վերջին շրջանում թուրք ադրբեջանական փոխադարձ ռազմական այցելությունների հետեւանք է համարում հայ-ադրբեջանական սահմանին աճող լարվածությունը:
«Հայկական բանակի կողմից վերջին երկու ամիսներին իրականացված պատժիչ գործողությունները մասամբ կասեցրել են Ադրբեջանի ակտիվությունը: Բայց Թուրքիան ամեն կերպ փորձելու է նոր խնդիրներ ստեղծել Ռուսաստանի Դաշնության համար կարևոր նշանակություն ունեցող հարակից տարածաշրջաններում` դրանով իսկ փորձելով խոչընդոտել Ռուսաստանի կողմից Սիրիայում իրականացվող ռազմական գործողություններին»,- կարծում է քաղաքագետը:
Նրա կարծիքով, Նյու Յորքում կայացած Հայաստանի և Ադրբեջանի արտաքին գործերի նախարարների հանդիպումը որևէ արդյունք չի տվել, հետեւաբար Ադրբեջանի ու Հայաստանի նախագահների հանդիպումը անհավանական է դառնում. «Միաժամանակ ակնհայտ է, որ խաղաղություն տարածքների դիմաց ադրբեջանական տրամաբանությունը այլևս չի կարող գործել, քանի որ Ադրբեջանն իր գործողություններով բոլորին ցույց տվեց, որ չի կարող լինել խաղաղություն արտահանող երկիր… Հայաստանի ՊՆ կողմից իրականացվող գործողությունները այս պահին հանդիսանում են մեր խաղաղության միակ ապավենը. այդ առումով մեր դիվանագիտությունը բավական հետ է մնացել»:
Անդրադառնալով արտաքին քաղաքական զարգացումներին՝ քաղաքագետը նկատեց, որ ԵՄ-ը փորձում է ակտիվացնել տարածաշրջանում իր քաղաքականությունը. «Հայաստան-ԵՄ բանակցային նոր մանդատի տրամադրումը վկայում է, որ Եվրոպան չի պատրաստվում հրաժարվել հետխորհրդային տարածաշրջանում իր ակտիվությունից»:
Կարդացեք նաև
Հիշեցնենք, որ Եվրամիության 28 անդամ պետությունները հոկտեմբերի 12-ին Լյուքսեմբուրգում մանդատ են տրամադրել Հայաստանի և ԵՄ-ի միջև նոր համաձայնագիր ստորագրելու շուրջ բանակցությունների մեկնարկի համար։
Արփինե ՍԻՄՈՆՅԱՆ
