Հայաստանի «Բազմաշերտ դիվանագիտության ինստիտուտ» կազմակերպության եւ Երեւանի պետական համալսարանի աջակցությամբ այսօր ազդարարվեց Հայաստանի «Գանդի» հիմնադրամի գործունեության մեկնարկը, որը տեղի ունեցավ ԵՊՀ-ում: Բուհի ռեկտոր Արամ Սիմոնյանը բացման խոսքում նշեց. «Սա մի գործունեություն է, որը ուղղված է ոչ միայն մեծն Մահաթմա Գանդիի գաղափարների, նրա կյանքի գործունեության ծանոթացմանն աշխարհին, այլ նաեւ այդ գործունեության արդիականացումը, նշանակությունը հաստատող եւ դրանից բխող մի գործունեության` հիմնադրամի, որը սկսել է 1983 թվականին եւ մինչ առ այսօր այդ հիմնադրամը շատ շնորհակալ եւ անձնվեր ծառայություն է անում՝ տարածելով Հնդկաստանի մեծ առաջնորդի գաղափարները, քարոզելով նրա գործունեությունը, որը ի սպաս է դրվել մի ամբողջ մարդկության պայծառ ապագայի կերտմանը»:
Ռեկտորի խոսքերով՝ հայերիս համար Գանդիի ամբողջ գործունեությունը ոչ միայն սեփական երկրին, ժողովրդին, մարդկությանը ծառայելու անձնազոհ օրինակ է, այլ նաեւ մեզ համար ուղեցույց է, թե ինչպես կարող է քաղաքական, հասարակական գործիչը, մեծ մարդասերը իր գաղափարները կենսագործել եւ ինչպիսի ճանապարհով կարող է հասնել իր գաղափարների իրական դրսեւորմանը:
«Գանդի» հիմնադրամի հայաստանյան ներկայացուցիչ Արսեն Խառատյանը Aravot.am-ի լրագրողի հետ զրույցում նշեց, որ մի քանի ուղղություններով բավականին հետաքրքիր նվաճումներ կարող ենք ունենալ այս հիմնադրամի հետ կապված. «Ակադեմիական տարածքն է դրանցից մեկը՝ կոնֆլիկտաբանության, արեւելագիտության մեջ ունեցած ավանդույթների վրա կառուցելու հնարավորությունը եւ Գանդիի միջոցով Հայաստանը ճանաչելու հնարավորությունը»:
Կարդացեք նաև
Նա ասաց, որ այն մեթոդները, որոնցով Գանդին իր կյանքով եւ իր աշխատանքով ցույց է տվել՝ նվաճումներ ունենալու եւ հասարակական տրանսֆորմացիաների հասնելու շատ կարեւոր մեթոդներ են, որոնք կարող են կիրառվել Հայաստանում սոցիալական շարժումների, քաղաքական գործընթացների տեսանկյուններից: «Բավականին ճանաչում ունեցող այս հիմնադրամին Հայաստան բերելով՝ լավ հնարավորություն ենք ընձեռում նոր ֆորումի, նոր տարածքում խոսելու հայ-հնդկական հարաբերությունները մեկ այլ մակարդակ հասցնելու տրամաբանությամբ»,-նշեց պարոն Խառատյանը:
Արսեն Խառատյանն ասաց, որ մի քանի ամիսների ընթացում Վրաստանի «Գանդի» հիմնադրամի հետ կկազմակերպվի Գանդիի շաբաթ՝ գիտաժողովի տրամաբանությամբ: Նաեւ կան գլոբալ նախաձեռնություններ, որոնցից է Դելլիից մինչեւ Ժնեւ ոտքով քայլելու մեծ միջոցառումը, որին, ըստ պարոն Խառատյանի, կմիանա նաեւ Հայաստանը:
Պարոն Խառատյանի խոսքերով՝ հիմնադրամի անդամակցումը կամավորության սկզբունքով է:
Անուշ ՄԱԹԵՎՈՍՅԱՆ
