«Հեղինակը փայլուն գիտակցել է իր սխալները, խոստովանել է դրանք»,- այսօր լրագրողների հետ զրույցում ասաց ՆԱՏՕ-ի պատվիրակության անդամ Թեւան Պողոսյանն`անդրադառնալով ՆԱՏՕ-ի վեհաժողովում քննարկվող ՌԴ-ին վերաբերվող բանաձեւին, որտեղ անցանկալի ձեւակերպումներ կան նաեւ ԼՂՀ-ի մասին: Հայաստանյան պատվիրակությունը, հիշեցնենք, հոկտեմբերի 9-12-ը Նորվեգիայում մասնակցել է ՆԱՏՕ-ի խորհրդարանական վեհաժողովի 61-րդ նստաշրջանին:
«Ակադեմիական ճշմարտությունն աղավաղելու խնդիր ունեին ձեւակերպումները: Մենք գիտենք, թե ինչքան վատ է ազդում ՌԴ-ն կոնֆլիկտի կարգավորման վրա` զենք վաճառելով Ադրբեջանին, բայց դա թողած, գրել են, որ ՌԴ-ն ծնել է խնդիրը ու կարծես ծնել է երեկ: Որեւէ մեկը պատմական իրողություններին չի անդրադարձել, որեւէ մեկին դա չի էլ հետաքրքրում: Հասկանալի է, որ պետք էր ՌԴ բառը նշել, նշել են, մեզ էլ ամեն անգամ ասում էին`ձեզ չի վերաբերվում, դուք ինչի եք խառնվել»,- ասաց բանախոսը:
Թեւան Պողոսյանի համար բավական զարմանալի էր, թե ինչո՞ւ էր այս նստաշրջանում ակտիվացել Թուրքիան, բավական մեծ պատվիրակությամբ էր եկել`քսան հոգով, այն դեպքում, երբ Ադրբեջանը մեկ պատվիրակով էր ներկայացված, քանի որ նոյեմբերին ընտրություններ են նաեւ Ադրբեջանում:
Թուրք պատվիրակը հակահայկական բուռն ելույթ է ունեցել, մասնավորաբար, ԼՂՀ հարցի վերաբերյալ`շարունակելով ադրբեջանական պատվիրակի կիսատ մնացած ելույթը: Այն ընդհատել է նիստը նախագահողը`կանխելով հայ-ադրբեջանական լեզվակռիվը: Պատասխանել է Թեւան Պողոսյանը. «Պատասխանս այնպիսին էր շարադրած, որ ինքը ստիպված ափերից դուրս եկավ»: Թեւան Պողոսյանը Կիպրոսի հետ համեմատականներ է տարել, ինչը դուր չի եկել թուրք պատվիրակին:
Կարդացեք նաև
Թեւան Պողոսյանը նաեւ գրավոր հարց է ուղղել ՆԱՏՕ-ի գլխավոր քարտուղարին` թուրքական ուղղաթիռների` հայկական սահմանի խախտման մասին: Պարոն Պողոսյանը ՆԱՏՕ-ի գլխավոր քարտուղարին հարցն ուղղել է միջանցքում, քանի որ նիստի ժամանակ հնարավորություն չի ունեցել: Վերջինս պատասխանել է, որ տեղյակ չէ ու խնդրել է հարցը գրավոր ներկայացնել: «Կա խոստում, որ պատասխան կլինի»,- ասաց բանախոսը` հավելելով, որ ակնկալում է, որ պատասխանը մինչեւ նոյեմբերի առաջին շաբաթվա ընթացքում կլինի, երբ Հայաստանում ՆԱՏՕ-ի շաբաթն է լինելու: «Հույս ունեմ, որ ՆԱՏՕ-ն իր արձագանքը կտա իր լավագույն գործընկերներից մեկի օդային սահմանի խախտման առիթով: Մանավանդ, որ երեք անգամ, ՆԱՏՕ-ի գլխավոր քարտուղարն իր ելույթում խոսեց ՌԴ-ի ուղղաթիռների` Սիրիայի սահմանը խախտելու մասին, ասաց, որ պատրաստ են թույլ չտալ, իրենց գործընկերների նկատմամբ ոտնձգություններ»:
Այլ մանրամասները` տեսանյութում
Նելլի ԳՐԻԳՈՐՅԱՆ
