Լեռնային Ղարաբաղի հակամարտության կարգավորման նպատակով Հայաստանի եւ Ադրբեջանի նախագահների սպասվող հանդիպումը որեւէ արդյունք չի կարող ունենալ։ Այս կարծիքը, «Trend»-ի հետ զրույցում, հայտնել է ԱՄՆ պետքարտուղարի Հարավային Կովկասի հարցերով նախկին օգնական, Ադրբեջանում ԱՄՆ նախկին դեսպան Մեթյու Բրայզան։
Նրա խոսքերով՝ այդ հանդիպումից հետո սրընթաց առաջընթացի սպասել պետք չէ. «Քանի դեռ կողմերի միջեւ վստահություն չկա՝ հնարավոր չէ խաղաղության հասնել։ Ես որեւէ հնարավորություն չեմ տեսնում, որ հանդիպումն արդյունավետ կլինի, սակայն, այն պետք է տեղի ունենա, որպեսզի վստահության մթնոլորտ ստեղծելու գործընթացը սկսվի։ Դա ինքնին դժվար եւ երկար գործընթաց է»։
Մեթյու Բրայզան կարծում է, որ Ռուսաստանը հետաքրքրված չէ հակամարտության լուծմամբ. նրան գոհացնում է «ոչ խաղաղություն ոչ պատերազմ» վիճակը, ինչը նրան թույլ կտա իրավիճակը շահարկել. «Ռուսաստանին պատերազմ էլ պետք չէ, սակայն առաջընթացի հնարավորություն այս պահին չկա»։
Այս պարագայում Բրայզան Ադրբեջանին խորհուրդ է տվել ամրապնդել տնտեսությունը, օգտվել նավթի գների անկումից եւ որոշ բարեփոխումներ կատարել։ Իսկ Հայաստանին նա առաջարկել է նվազեցնել կախվածությունը Ռուսաստանից, ռուսական ներդրումներից եւ էներգետիկ համակարգից. «Ռուսաստանը տիրապետում է Հայաստանի գլխավոր ենթակառուցվածքներին, ինչը Սարգսյանի դիրքերը թուլացնում է այդ երկրի առջեւ»։
Կարդացեք նաև
Պատրաստեց Աշոտ ԻՍՐԱԵԼՅԱՆԸ
