«Օքսֆամ» հայաստանյան գրասենյակը և «ՀԱՐԹԱԿ» փորձի փոխանակման ծրագրի ներկայացուցիչներն այսօր Միսաք Մանուշյանի անվան պուրակում կազմակերպել էին Food փառատոն, որի մասնակիցները ներկայացրեցին իրենց արտադրանքը, խորհուրդներ ստացան խոհարարներից եւ գործակցության առաջարկներ՝ մի շարք ռեստորաններից ու սպառողներից:
«Կարեւոր է, որպեսզի գյուղացիները գտնեն այն ռեստորանները, որոնց հետ ուղիղ կապ կունենան եւ կաշխատեն: Այսինքն` ամեն խոհարար կունենա իր գյուղը, որտեղ կաճեցվեն անհրաժեշտ մթերքները, եւ այդ ամենը՝ առանց վերավաճառողների միջամտության»,-Aravot.am-ի հետ զրույցում ասաց փառատոնի համակարգող Աննա Մազմանյանը: Նա ուսումնասիրել է բոլոր մարզերում առկա խնդիրները. առանձնացրեց Տավուշը. «Այդ մարզի գյուղերում մնացել են միայն կանայք, որոնք աշխատանք չունեն:
«Օքսֆամ»-ի ստեղծած ջերմոցներում են աշխատում եւ հիմա հարց է առաջացնում՝ ինչ աճեցնել եւ ինչպես: Այդ խորհրդատուի պակասի խնդիր կա: Պետք է սահմանենք այն մրգերի եւ բանջարեղենի տեսակները, որոնք կգնեն ռեստորանները: Շատ մշակաբույսերի սերմեր այստեղ չկան, այդ պատճառով նախատեսում եմ որոշ տեսակներ բերել Հայաստան, որպեսզի աճեցվի ոչ թե մի, այլ մի քանի տեսակ «մառոլ», որը բավականին պահանջված է ռեստորանների կողմից,-հավելեց Աննան:
Միջոցառման ընթացքում վաճառվեցին ՕՔՍՖԱՄ-ի աջակցությամբ հիմնադրված համայնքային գյուղատնտեսական կոոպերատիվների արտադրած գյուղմթերքները: Տավուշի մարզի Լճկաձոր համայնքի «Դեբեդ» սպառողական կոոպերատիվի նախագահ Լուսինե Բեջանյանը մեզ հետ զրույցում նշեց, որ կոոպերատիվի կազմում 12 անդամ կա, որոնք ջերմոցային տնտեսությամբ են զբաղվում. «Մեր զբաղվածության խնդիրն է լուծվել, ներգրավվել ենք աշխատանքում, կարողանում ենք լումա վաստակել ընտանիքի համար»:
Կարդացեք նաև
Լուսինեի տաղավարում ներկայացված էին Լճկաձորի բերքն ու բարիքները՝ նուռ, ընկույզ, չրեր:
Լուիզա ՍՈՒՔԻԱՍՅԱՆ
