Սոցիալ Դեմոկրատ Հնչակյան կուսակցության Հայաստանի կազմակերպության 10-րդ համագումարի բացման արարողությունից ՍԴՀԿ Հայաստանի վարչության ատենապետ Նարեկ Գալստյանը պատասխանեց լրագրողների հարցերին:
Նա տեղեկացրեց, որ կուսակցությունը միջվարչային ժողով է իրականացրել եւ ընդհանուր եզրահանգման են եկել, որ խորհրդարանական համակարգը բխում է ՀՀ շահերից եւ խորհրդարանական կառավարման համակարգը աշխարհիկ քաղաքագիտական մտքի լավագույն դրսեւորումն է. «Այսինքն՝ խորհրդարանական կառավարման համակարգը իսկապես մեկ քայլ առաջ է, սակայն դրա արդյունքները, դրա պտուղը ուտելու համար պետք է քաղաքական կամք եւ արմատական բարեփոխումներ»:
Նարեկ Գալստյանը նշեց, որ Սահմանադրական բարեփոխումների շրջանակներում Հնչակյան կուսակցությունը մի շարք հանդիպումներ է ունեցել, եւ կուսակցության հիմնական մտահոգությունները փարատվեցին նախագծի վերջնական տարբերակի հրապարակվելուց հետո. «Ընտրությունների առաջին փուլում կոալիցիայի հնարավորություն չէր տրվում է, այսօր առաջին փուլում կոալիցիայի հնարավորություն տրվում է եւ կարծում եմ, որ գործող իշխանական կուսակցությանը հեռացնելու լավագույն տարբերակը դա է լինելու»:
Ըստ նրա՝ արմատական փոփոխությունները Սահմանադրությունից կախված չեն. «Խորհրդարանական կառավարման համակարգը հիմք է տալիս, առիթ է տալիս, որ երկրում որոշակի բարեփոխումներ լինեն, բայց եթե մեր երկրում չպետք է լինի քաղաքական հստակ կամք, եւ այն իշխանությունը, որը կընտրվի 2017 թվականին չցանկանա գնալ արմատական բարեփոխումներին, ապա ինչպես այս, այնպես էլ նախկին բոլոր սահմանադրությունները կմնան թղթի վրա»:
Կարդացեք նաև
Ամի ՉԻՉԱԿՅԱՆ
