«Լեռնային Ղարաբաղի հակամարտության կողմերը անընդհատ հայտարարում են այն խաղաղ, քաղաքական եւ դիվանագիտական միջոցներով լուծելու իրենց հանձնառության մասին: Սակայն, վերջերս շփման գծում եւ հայ-ադրբեջանական սահմանին հրետանու, ծանր զինատեսակների եւ հրթիռային կայանների օգտագործումն իրավիճակի սրացման պատճառ դարձան»,- այս մասին, ադրբեջանական «Apa» գործակալության հետ զրույցում, ասել է ԵԱՀԿ Մինսկի խմբի ռուս համանախագահ Իգոր Պոպովը:
Նա շեշտել է, որ վերջին սրացումների արդյունքում զոհերի թիվը մեծացել է, այդ թվում՝ քաղաքացիականների շրջանում. «Կողմերը սովորաբար հրադադարի խախտման պատասխանատվությունն իրար վրա են գցում: Եվ այս դեպքն էլ բացառություն չի: Այնուամենայնիվ ոչ ԵԱՀԿ համանախագահները, ոչ էլ իր դիտարկման առաքելությունը չունեն հնարավորություն առանց հետաքննության որոշելու մեղավորներին»:
Իգոր Պոպովն անդրադարձել է նաեւ հակամարտության լուծմանն ուղղված ԵԱՀԿ Մինսկի խմբի համանախագահների առաջարկներին: Նա ասել է, որ միջնորդների շնորհիվ կողմերը որոշ կարեւոր հարցերով նույն դիրքորոշմանն են եկել. «Հակամարտության կարգավորման հիմնական սկզբունքներն ընդունելի են երկու կողմերի համար: Դրանք շատ լավ հայտնի են բոլորին, Մինսկի խմբի համանախագահներն էլ պարբերաբար իրենց հայտարարություններում խոսել են այդ մասին»:
Ըստ Պոպովի՝ հակամարտության կողմերը չեն մերժում հիմնական սկզբունքները: Նրանք ուղղակի դրանք իրականացնելու տարբեր հաջորդականություններ են պատկերացնում. «Հիմնական առաջադրանքը կողմերին օգնելն է, որպեսզի արդեն հասած արդյունքներում անհրաժեշտ ուղղումներ կատարելով հավասարակշռված լուծման գան»:
Կարդացեք նաև
Անդրադառնալով Սերժ Սարգսյանի այն հայտարարությանը, թե «երբ ես ասում եմ Հայաստանը, Լեռնային Ղարաբաղը նրա անբաժան մասն է», Իգոր Պոպովն ասել է, թե տեղեկատվական եւ քարոզչական պլանի վրա հետեւողական կենտրոնացումն, ինչի համար շատ պատճառներ են եղել վերջերս, «վատ ազդեցություն են ունենում բանակցային գործընթացի վրա: Ինչ վերաբերում է Լեռնային Ղարաբաղի կարգավիճակին, այն պետք է որոշվի հակամարտության կողմերի համաձայնությամբ»:
Պատրաստեց Աշոտ ԻՍՐԱԵԼՅԱՆԸ
