Դասախոսության ավարտին եվրոպացի չինովնիկը բացականչեց. «Long live, Armenia»:
ԵՄ-ն բարի քաղաքական կամք ունի Հայաստանի հետ համագործակցության նոր պայմանագիր ստորագրելու եւ ես հույս ունեմ, որ մեր գործընկերները Երեւանում կբացեն այն դուռը, որը իրական առաջընթաց կապահովի այդ հարցում: Այսօր այդ մասին լրագրողներից մեկի հարցին`ինչ հեռանկարներ է տեսնում Հայաստան-ԵՄ հարաբերությունների զարգացման համար, ի պատասխան հայտարարեց Եվրախորհրդարանի փոխնախագահ, Ռիչարդ Չարնեցկին:
Պարոն Չարնեցկին այսօր Երեւանի Վալերի Բրյուսովի անվան լեզվաբանական համալսարանում դասախոսություն կարդաց`«Հայաստանի եւ ԵՄ-ի հարաբերությունները» թեմայով:
«Ես բավական լավատեսորեն եմ տրամադրված, քանի որ տեսնում եմ իրական հեռանկարներ`Հայաստան-ԵՄ հարաբերությունների երկկողմ զարգացման համար: Համոզված եմ, որ միասին մենք կարող ենք բացել մեր հարաբերությունների զարգացման նոր էջ»,- ասաց նա հավելելով, որ անչափ ուրախ է, որ այսօր Երեւանում, Եվրոպական ներդրումային բանկն` բանկի փոխնախագահի ներկայությամբ եւ ՀՀ-ում ԵՄ պատվիրակությունը հայկական կողմի հետ ազատ ֆինանսավորում իրականացնելու համաձայնագիր են ստորագրել:
Կարդացեք նաև
Նա ոչ պակաս կարեւոր է համարում Հայաստան-ԵՄ առեւտրաշրջանառությունը խթանելու առիթով կայացած հատուկ քննարկումը: «Անկեղծ ասած, մեր հարաբերություններում երկու տարի առաջ սկսված ճգնաժամից հետո, հիմա ես տեսնում եմ իրական հեռանկարներ`մեր քաղաքական հարաբերությունների արագ կարգավորման համար: Վստահ եմ, որ երկու կողմերն էլ տեսնում են այդ հեռանկարը»,- ասաց Ռիչարդ Չարնեցկին:
Արդեն դասախոսության ժամանակ անդրադառնալով Հայաստան-ԵՄ հարաբերություններին, պարոն Չարնեցկին ասաց, որ Հայաստան-ԵՄ նոր փաստաթուղթը, որը պատրաստվում է ստորագրման, երկու կողմերի համար էլ բարենպաստ կլինի թե տնտեսական, թե քաղաքական առումներով:
Նա գտնում է, որ հայ ժողովրդի պատմությունը եվրոպական ազգության պատմություն է. «Մենք պետք է սերտորեն համագործակցենք այնպիսի ազգի հետ, ինչպիսին ձեր ազգն է»: Դասախոսության ավարտին եվրոպացի չինովնիկը բացականչեց. «Long live, Armenia»:
Երեւանի Վալերի Բրյուսովի անվան լեզվաբանական համալսարանի գիտխորհրդի որոշմամբ, Ռիչարդ Չարնեցկուն շնորհվեց Երեւանի Վալերի Բրյուսովի անվան լեզվաբանական համալսարանի պատվավոր անդամի կոչում:
Նելլի ԳՐԻԳՈՐՅԱՆ
