Հերիքնազ Տիգրանյանի կարծիքով՝ մենք գործող Սահմանադրությունը մինչեւ վերջ չգործարկեցինք
«Մենք ավելի բովանդակային քննարկում ենք անում»,- հոկտեմբերի 15-ին «Դեբատ» մամուլի ակումբում լրագրողների հետ հանդիպման ընթացքում ասաց «Թրանսփարենսի ինթերնեշնլ» հասարակական կազմակերպության իրավախորհրդատու Հերիքնազ Տիգրանյանը:
Ըստ նրա, շարքային քաղաքացուն հետաքրքրում է, թե սահմանադրական փոփոխությունները որքանով դրական կանդրադառնան իր կյանքի որակի վրա, եւ եթե իր կյանքի որակը դրանից չի փոխվի, կառավարման համակարգը էական նշանակություն չի ունենա: Հերիքնազ Տիգրանյանը կարծում է, որ քաղաքացիները պետք է տարակուսեն, թե ինչու են իշխանություններն այսքան շտապում սահմանադրության փոփոխություններն իրականացնել.
«Մեր խորին համոզմամբ՝ մենք գործող Սահմանադրությունը մինչեւ վերջ չգործարկեցինք, որ տեսնենք, թե որտեղ են դրա թերությունները: Հայեցակարգում, հիշում եք՝ անընդհատ շահարկվում էր, որ գործող Սահմանադրությամբ մարդու իրավունքների բաժինը շատ վատ է խմբագրված, եւ դա հնարավորություն չի տալիս իրավակիրառ պրակտիկայում պաշտպանել մարդու իրավունքները: Դուք կարծում եք նախագիծը ավելի բարելավե՞ց մարդու իրավունքների գլուխը, շատ ավելի վատթարացան, շատ ավելի հետընթաց նորմեր կան Սահմանադրության նախագծի տեքստում, որը վաղը կդառնա Սահմանադրություն: Ասել, որ մարդու իրավունքների բաժինը ակնհայտ արմատական փոփոխության ենթարկվեց՝ դրական իմաստով, ես չեմ կիսում»:
Կարդացեք նաև
Նա նշեց, որ հասել ենք փոփոխությունների այն փուլին, որ քաղաքացիական հասարակությունը, իրավաբանները, փաստաբանները եւ հետաքրքրված անձինք հազիվ հասցնում են գործընթացի հետեւից գնալ. «Այս շտապողականության արդյունքում՝ մենք ինչ ասում ենք, լինում է պոստ ֆակտում. Մենք ներկայացնում ենք առաջարկություններ, դա արդեն պոստ ֆակտում է, հոկտեմբերի 5-ին նախագիծը ընդունվել է: Ընդունված նախագծային տարբերակով շատ ավելի հետընթաց խմբագրական փոփոխություններով արվեց, քան նախագծային տարբերակում էր: Այսինքն՝ ոչ միայն գործող Սահմանադրության համեմատ եղան փոփոխություններ, այլ հենց նախագծի համեմատ եղան փոփոխություններ»:
Ամի ՉԻՉԱԿՅԱՆ
