Տան պայմաններում եթե ինչ-որ մեկը իրեն լավ չի զգում` սրտխփոց, սրտանոթային համակարգի նեւրոզներ, անմիջապես օգտագործում է վալերիանի` կատվախոտի կաթիլներ կամ դեղահաբ:
Կատվախոտը բուժական նպատակով հիմնականում օգտագործում են որպես հանգստացնող, սրտի գործունեությունը կարգավորող, ցավազրկող, կծկանքը վերացնող, լեղամուղ, աղեստամոքսային համակարգի գեղձերի հյութազատությունը խթանող միջոց:
Այն լավ քնաբեր է: Իջեցնում է արյան բարձր ճնշումը, նյարդային բարձր գրգռվածությունը, լայնացնում սրտամկանը սնուցող պսակաձեւ անոթները:
Բուժական նպատակով օգտագործում են բույսի կոճղարմատը եւ արմատը, որոնք ունեն խիստ բնորոշ հոտ, դառը համ: Հավաքում են ինչպես գարնանը, այնպես էլ ուշ աշնանը: Լվանում եւ չորացնում են լավ քամհարվող, ստվերոտ տեղում:
Բույսը պարունակում է եթերայուղ, որով էլ պայմանավորված է բույսի բնորոշ հոտը, ինչպես նաեւ ալկալոիդներ, դաբաղող նյութեր, օսլա, խեժ, օրգանական թթուներ եւ այլն:
Կատվախոտը բժշկության մեջ կիրառվում է նաեւ անքնության, միգրենի, գլխացավերի, սրտանոթային համակարգի նեւրոզների, կրծքային հեղձուկի, հիպերտոնիկ հիվանդության, ստամոքսի եւ աղիների կծկանքի դեպքում:
Կիրառման նպատակով պատրաստվում է հետեւյալ ջրաթուրմը. 10-20 գրամ հումքը 30 րոպե թրմել 200 միլիգրամ եռման ջրում, հովացնել, քամել եւ խմել 1 ճաշի գդալ` օրական 3-4 անգամ:
Եփուկ պատրաստելու համար անհրաժեշտ է 10 գրամ հումքը 300 միլիգրամ ջրում 15 րոպե եռացնել, հովացնել, քամել եւ խմել մեկական ճաշի գդալ` օրական 3 անգամ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
14.10..2015
