«Սահմանադրական հանրաքվեին ընդառաջ Հայաստանի քաղաքական կյանքում եւ տեղեկատվական դաշտում առկա է հասարակության մեջ բեւեռացում ստեղծելու միտումը»,-հոկտեմբերի 14-ին «Հայք» մամուլի ակումբում լրագրողների հետ հանդիպման ընթացքում ասաց «Լույս» տեղեկատվական վերլուծական կենտրոնի ղեկավար Հայկ Այվազյանը:
Ըստ նրա՝ այդ միտումն արտահայտվում է հասարակությանը բաժանելով ոչ-ի եւ այո-ի ճակատների եւ նրանց միջեւ լարում ստեղծելով. «Փաստենք, որ սեպտեմբերի 30-ից հետո աշխարհում եւ մեր տարածաշրջանում լուրջ աշխարհաքաղաքական եւ տարածարջանային գործընթացներ են ընթանում, այսինքն՝ Ռուսաստանը եւ Իրանը միացել են ռազմական գործողություններին Սիրիայում, Թուրքիան շուրջ երեք տարի է, ինչ այդ գործողություններին մասնակցում է, մեր հարեւան Ադրբեջանը շարունակական կերպով լարվածության մեջ է պահում մեր սահմանը եւ սադրիչ ռազմական գործողություններ է իրականացնում: Վերը նշված իրողությունները հաշվի առնելով` անթույլատրելի ենք համարում Սահմանադրության նախագծի շուրջ ներքաղաքական լարումները, քանզի օտարերկրյա ազդեցության գործակալների եւ որոշ շահագրգիռ պետությունների շահերից է բխում ապակայունացնել իրավիճակը Հայաստանում այնպես, ինչպես կատարվել է մի շարք արաբական երկրներում եւ Ուկրաինայում: Ուստի՝ կոչ ենք անում բոլոր քաղաքական ուժերին լինել զգոն, Սահմանադրության նախագծի եւ հանրաքվեի հետ կապված գործողություններն իրականացնել բացառապես օրենքի շրջանակներում՝ ապակայունացումից խուսափելու համար»:
Իսկ Երեւանի աշխարհաքաղաքական ակումբի ղեկավար Արման Բոշյանն ասաց, որ համարում է՝ այս պահին ամեն մարդ ինքը պետք է որոշի այո ասե՞լ Սահմանադրության նախագծին, թե՞ ոչ. «Ես չեմ ուզում բացարձակապես ոչ մի կոչ անել, ոչ մի դաշտ մտնել այո-ի կամ ոչ-ի, սա արդեն քաղաքական տեխնոլոգիա կլինի, քաղաքական բեւեռացման խաղ կլինի»:
Կարդացեք նաև
Ըստ նրա՝ «Ոչ»-ի ճակատը պետք է հստակ առաջարկություններ ներկայացնի՝ եթե ոչ են ասում Սահմանադրության նախագծին, ապա ինչի՞ն են այո ասում. «Ես ուզում եմ լսել, կարող է իրենց մոտ կառուցողական ծրագիր կա, այդ դեպքում մեծ ուրախությամբ կմասնակցենք»:
Ամի ՉԻՉԱԿՅԱՆ
