Լիտվայի Կլայպեդա քաղաքում անցկացված ծանրամարտի Եվրոպայի 20 եւ 23 տարեկան տղաների եւ աղջիկների առաջնությունում Հայաստանի ներկայացուցիչները հաջող մասնակցություն ունեցան:
Երկու տարիքային խմբերում մեր տղաներն ու աղջիկները երկամարտում ընդհանուր առմամբ տվեցին երկու չեմպիոն, երկու փոխչեմպիոն եւ երկու բրոնզե մրցանակակիր: Էլ չենք նշում առանձին վարժություններում նվաճած փոքր ոսկե, արծաթե եւ բրոնզե մեդալները, որոնց ընդհանուր քանակը հասնում է մոտ երկու տասնյակի: Վիճակագրական այս տվյալներին հարկ է ավելացնել նաեւ ընդհանուր թիմային հաշվարկում կրտսեր տարիքի տղաների Հայաստանի հավաքականի գրաված երրորդ տեղը:
Կլայպեդայում փաստացի իրականացան Հայաստանի ծանրամարտի ֆեդերացիայի փոխնախագահ Վահան Խեչանանի՝ մեր թիմերի մրցավայր մեկնելուց առաջ «Առավոտին» տված հավաստիացումները, թե Եվրոպայի առաջնությունում մեդալներ շատ կլինեն: Ֆեդերացիայի գլխավոր քարտուղար Փաշիկ Ալավերդյանն էլ, որը Եվրոպայի առաջնության մրցավարների խմբում էր, վերադառնալուց հետո մեզ հետ ունեցած զրույցում ասաց, որ դժգոհ չէ մեր հավաքականների մրցելույթներից:
Հայ մարզասերներին այստեղ հարկ ենք համարում հիշեցնել, որ որոշ քաշային կարգերում մեր ուժեղագույնները Կլայպեդա չէին գործուղվել, քանի որ նրանք նախապատրաստվում են նոյեմբերին ԱՄՆ-ում կայանալիք մեծահասակների աշխարհի վարկանիշային առաջնությանը: Հակառակ դեպքում Լիտվայում նվաճած մեր մեդալների քանակը կարող էր անհամեմատ ավելի շատ լինել:
ԱՇՈՏ ՀԱԿՈԲՅԱՆ
«Առավոտ» օրաթերթ
14.10..2015
