Քիչ առաջ Ստրասբուրգում ևս մեկ կազմակերպություն միացավ ԵԽ-ի կողմից ստեղծված լրագրողների պաշտպանության հարթակին: Լրագրողների հետ զրույցում ԵԽ գլխավոր քարտուղար Թորբյորն Յագլանդը ահազանգեց, որ ԵԽ անդամ երկրների մեկ երրորդում չկան բարենպաստ պայմաններ մամուլի ազատության ապահովման առումով: Հարթակին միացավ լրագրողների պաշտպանության կոմիտեն:
ԵԽ գլխավոր քարտուղարն ասաց. «Լրագրողները ենթարկվում են բազմաթիվ սպառնալիքների, իսկ դրանք պետք է տեսանելի լինեն անդամ երկրների կառավարությունների համար: Հարթակի նպատակն է յուրաքանչյուր խնդիր տեսանելի դարձնել անդամ երկրների համար: Լրագրողների նկատմամբ յուրաքանչյուր սահմանափակում բռնություն ու սպառնալիք քննարկվելու է այս հարթակում»:
Պարոն Յագլանդը մտահոգություն հայտնեց, թե ի՞նչ է նշանակում, որ օլիգարխը լրատվամիջոցի սեփականատեր է, դա կարող վտանգավոր հետևանքներ ունենալ:
Նշենք, որ հարթակը սկսել է գործունեություն ծավալել 2015-ի ապրիլից և արդեն քննարկել է 84 ահազանգ 21 անդամ երկրներից: 25-ը վերաբերում են լրագրողների նկատմամբ ֆիզիկական բռնություններին, 21-ը հետապնդմանն ու կալանավորմանը, 8-ը անպատժելիությանը, 8-ը լրագրողների նկատմամբ ոտնձգություններին և 22-ը այս կամ այն կերպ առնչվում են մամուլին ազատության սահմանափակումներին: 11 ահազանգեր վերաբերում են լրագրողների սպանություններին, որոնցից ութը Շառլի Էբդոյի ոտնձգությանը:
Կարդացեք նաև
Ադրբեջանցի լրագրողը ԵԽ գլխավոր քարտուղարից հետաքրքրվեց՝ հնարավո՞ր է հարթակի գոյությունը ինչ-որ կերպ դրական առումով իրավիճակ փոխի Ադրբեջանում, պարոն Յագլանդը պատասխանեց. «Դժվար է ասել՝ Ադրբեջանում իրավիճակ կփոխվի, թե՝ ոչ, քանի դեռ մարդու իրավունքների պաշտպաններն ու լրագրողները գտնվում են բանտերում: Մեզ համար դա լրջագույն խնդիր է, քանի որ ունենք անդամ երկիր, որտեղ խայտառակ իրավիճակ է տիրում այս առումով: Ադրբեջանի իշխանությունները նախևառաջ պետք է կատարեն Մարդու իրավունքների եվրոպական դատարանի վճիռները»:
Տաթև ՀԱՐՈՒԹՅՈՒՆՅԱՆ
