Քաղաքագետ Հայկ Մարտիրոսյանի գնահատմամբ, Հյուսիսային Կովկասում իսլամիստների ակտիվությունը նվազել է, որովհետեւ գնացել են Սիրիա կռվելու:
Այսօր «Հայելի» ակումբում քաղաքագետը Սիրիայում Ռուսաստանի սկսած գործողությունները բացատրեց նաեւ իսլամիստների՝ Հյուսիսային Կովկաս վերադարձը թույլ չտալու ցանկությամբ. «Ռուսաստանը խնդիր ունի թույլ չտալ նրանց վերադարձը, ոչնչացնել նրանց հենց տեղում: Բացի դա, իր ռազմական ներկայությունը պաշտպանելու ու Միջին Արեւելքում իր ներկայությունը մեծացնելու խնդիր ունի եւ համաշխարհային ահաբեկչության պետության ստեղծման կասեցման խնդիր ունի»:
Նրա կարծիքով, Ռուսաստանը Սիրիայում գործողություններ սկսելուց առաջ Արեւմուտքից աջակցության ակնկալիքներ չի էլ ունեցել. «Որովհետեւ պարզից էլ պարզ էր, որ Արեւմուտքը ցանկանում է Ասադի իշխանության անկումը, իսկ Ռուսաստանը դա չի ցանկանում, ինչու, որովհետեւ կապված են Պարսից ծոցի երկրների ղեկավարների ու նավթային շահերի հետ»:
Նա խուսափեց սիրիական հարցում կանխատեսումներ անել, ասաց՝ ամեն օր նոր բան է փոխվում. «Օրինակ, քիչ առաջ տեղեկացա, որ ԱՄՆ օդուժը հիսուն տոննա զինամթերք է նետել Սիրիայի հյուսիսում գտնվող ու քրդական ուժերի հետ համագործակցող ապստամբների վրա: Նման փաստերը հաշվի առնելով՝ դժվար է կանխատեսումներ անելը»:
Կարդացեք նաև
Ըստ նրա, Արեւմուտք -ՌԴ լարվածությունը առաջիկայում ավելի կմեծանա, որովհետեւ հանրապետական լոբբին ԱՄՆ կոնգրեսում ու քաղաքական դաշտում բավական մեծ ճնշում է գործադրում Օբամայի վարչակարգի վրա, որ առավել մեծ հակադրություն ցուցաբերի ՌԴ գործողություններին:
Արփինե ՍԻՄՈՆՅԱՆ
