«Գործող Սահմանադրությունը թույլ չի տալիս փոխել իշխանությունը». այսօր Սահմանադրական փոփոխությունների մասին Ֆրիդրիխ Էբերտ հիմնադրամի կազմակերպած հանրային քննարկման ժամանակ այսպիսի հայտարարություն էր արել «Համաձայնություն» կենտրոնի ղեկավար Դավիթ Շահնազարյանը:
ՀԱԿ խմբակցության ղեկավար Լեւոն Զուրաբյանը, պատասխանելով Դավիթ Շահնազարյանին, ասաց. «Կներեք, ավելի աբսուրդ պնդում դժվար էր պատկերացնել: ՀՀ-ում իշխանություն չի փոխվում ընտրությունները կեղծելու պատճառով: Եվ 1995-ի Սահմանադրությամբ, եւ 2005-ի Սահմանադրությամբ եւ գալիք Սահմանադրությամբ, եթե ընտրությունները չկեղծեն, իշխանությունը հանգիստ կարելի է փոխել»:
Ըստ նրա, ՀՀ-ին պետք է միայն ազատ եւ արդար ընտրություններ, եթե դա արվի, գործող Սահմանադրությունը կլինի լիարժեք երաշխիք:
Ինչ վերաբերում է 1995-ի Սահմանադրությանը, նրա խոսքերով՝ «Կոմունիստական լծից ազատվելուց հետո բոլոր երկրները պետք է ունենային իրենց Սահմանադրությունը, որը թույլ կտար ազատվել կոմունիստական ժառանգությունից»:
Կարդացեք նաև
Դավիթ Շահնազարյանը նաեւ ընդդիմությանն ու իշխանությանը սահմանազատելուց էր խոսել՝ որպես չափորոչիշ ընդունելով ԵՏՄ-ին անդամակցությանը քվեարկությունը: Զուրաբյանը դա հանրությանը շեղելու փորձ որակեց:
Դավիթ Շահնազարյանը պատասխանեց. «Չգիտես ինչու, համարեցին, որ ես «այո»-ի կողմնակից եմ: Պետք չի ինձ խեղաթյուրել: Ըստ էության, հասարակության լայն զանգվածներին չի հետաքրքրում այս Սահմանադրությունը: Շատ ավելի էր հետաքրքրում մշակութային ինչ-որ գործիչների կոչումներ տալը: Հասարակության մոտ կա անվստահություն թե՛ իշխանության, թե՛ ոչ իշխանական ուժերի հանդեպ»:
Հռիփսիմե ՋԵԲԵՋՅԱՆ
