Առաջին անգամը չէ, որ հայրենի քաղգործիչները անհեթեթ, անհիմն ու անտաղանդ հայտարարություններ են անում: Առավել եւս, առաջին անգամը չէ, որ հենց Լեւոն Զուրաբյանն է նման հայտարարություններով աղմուկ հարուցում:
Արտաքուստ այնպիսի տպավորություն է, թե հայրենի քաղաքական որոշ գործիչներ հեռակա մրցակցության մեջ են մտել Հայաստանի ֆուտբոլի ազգային հավաքականի հետ այն առումով, թե ով ավելի անտաղանդ դրսեւորումներով աչքի կընկնի: Մի հարցում երկուսն էլ մեծ առաջադիմություն են գրանցել: Նկատի ունենք ֆուտբոլի հավաքականն ու Լեւոն Զուրաբյանին: Երկուսն էլ արդյունք, որպես այդպիսին, չունեն:
Մի բան լավ է: Այն, որ վերջապես համապատասխան ընթացք տրվեց աղմկահարույց նման մի հայտարարության: Այլապես ժամանակ առ ժամանակ, մանավանդ ընդդիմադիր ճամբարի ներկայացուցիչները, այս կամ այն գործչի, հաստատության հասցեին անում են ծանր մեղադրանքներով համեմված հայտարարություններ: Սովորաբար այդ հայտարարություններին իրավական ընթացք չի տրվում, եւ իզուր, ի դեպ:
Այնինչ յուրային քարոզչական միջոցները, տվյալ քաղգործչի կամ նրա ներկայացրած կուսակցության համակիր քաղաքացիներն ինտենսիվորեն տարածում ու շրջանառում են այդօրինակ հայտարարությունները, դրանցից այսպես ասենք՝ կայուն մտակաղապարներ ու քարոզչական կլիշեներ են հյուսվում: Իսկ հետո, եթե շատ էլ ցանկանաս, այդ բանահյուսական կաղապարը չես կարող չեզոքացնել:
Կարդացեք նաև
Իսկ այս դեպքը, կարծում ենք, շատ լավ առիթ կարող է լինել, որ հայրենական քաղաքական գործիչները որեւէ մեղադրանք ներկայացնելիս, նման հայտարարություններ անելիս իրենց նեղություն տան փաստարկված ու հիմնավորված խոսել:
Այլապես այնպիսի տպավորություն է, որ հանրության հետաքրքրությունը հարուցելու որեւէ այլ տարբերակ նրանք արդեն չունեն, բացի ամպադղորդ, որպես կանոն՝ փուչ հայտարարություններով ուշադրություն հրավիրելուց:
Ա. ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
